The Definitive Guide to Living in the Capital , Cairo , Egypt

الإتيكيت حاجة مهمة، ولازم نعترف إن العلم المهم ده غاب بدرجة ما عن شوارع القاهرة، وبقينا نشوف سلوكيات سلبية كتير، وعلشان كده قررت الكاتبة أمل رضوان تعمل كتاب كل صفحاته بتشجع الناس على التعامل بإتيكيت وأخلاق عالية مع المجتمع، والكتاب بعنوان “أخلاق للبيع” .. سر التركيبة”، وهو صادر عن مكتبة زهراء الشرق، ومتاح للبيع حاليًا في معرض الكتاب، وخلال أيام هيكون موجود في أهم مكتبات القاهرة.

وبتقول الكاتبة أمل رضوان إن كتابها بيمزج ما بين فنون الإتيكيت وعلم الأخلاق وفنون التربية وعلم النفس وعلم الاجتماع وعلم الطب الاجتماعى، وبيحاول يقدم للقراء سر التركيبة المهمة دي، ومن فين ممكن نشتري الأخلاق في مجتمعنا.

الكتاب بيتناول فنون الإتيكيت اللي بيمثل الوجه الآخر للأخلاق، ومعناه احترام النفس واحترام الأخرين ومراعاة مشاعرهم والسمو الأخلاقي وكيفية التعامل برقي في جميع الأوقات والمناسبات الخاصة والعامة وفى المحافل الرسمية والاجتماعية.

وبتؤكد الكاتبة إن مفهوم الإتيكيت أشمل وأعم من المفهوم القاصر على المظهر الخارجي وطريقة تناول الطعام وارتداء الملابس، وبتضيف إن الإتيكيت هو نظام حياة وسلوكيات في المقام الأول ومابيرتبطش بمستوى ثقافي أو مادي مرتفع.

كمان بيقدم الكتاب تحليل نفسي للشخصيات وسمات كل شخصية والطريقة الأمثل للتعامل مع كل نمط شخصية برقي، وكمان كيفية التعامل بإتيكيت مع الحموات والأطفال، وكيفية التعامل الراقي في جميع المواقف الحياتية حتى المواقف المحرجة والغريبة كالتعامل مع الشخصيات الصعبة والمتطفلة وأطفال الشوارع، وكمان بيعلمكم الكتاب إزاي تتصرفوا مع مواقف مختلفة زي مثلًا الحصول على هدية غير لائقة، أو نسيان اسم شخص، ده غير إتيكيت الطلاق والعزاء وإتيكيت العلاقات الاجتماعية والزوجية وغيرها كتير من المواقف.

جدير بالذكر إن معرض القاهرة الدولي للكتاب بيقام حاليًا في دورته الـ 51، اللي انطلقت فعالياته يوم 22 يناير، وهيستمر لحد يوم 4 فبراير، تحت عنوان “مصر أفريقيا – ثقافة التنوع”، والدورة دي بتتخذ من الراحل جمال حمدان شخصية لها والسنغال ضيف شرفها.