The Definitive Guide to Living in the Capital , Cairo , Egypt

 طبيعى

أنك تقول لصاحبك ع القهوة:

الحياه مش بروفة

وطبيعى

أن أبوك يخاف عليك وعلى أخواتك

م الموت

فعلًا طبيعى أنك تقول لصاحبك الحياة مش بروفة، جملة هى
عنوان الديوان وهى اللى بـ تصنع أساس حكايته، ولو فكرت شوية هـ تلاقيها واحدة من
أهم أساسات الحياة، الحياة لازم تعيشها بطريقتك رسالة بـ يوجهها الشاعر لكل الناس،
يمكن يقدروا يعيشوا بشكل جيد، الحياة مش بروفة عرض مسرحى أو فيلم سينما، الحياة هى
العرض المسرحى نفسه أو الفيلم، علشان كده لازم تكون قدها.

ومن الفكرة دى بـ يدور الديوان عن الحياة وبـ يكلمنا عن
الناس التعبانة فى الدنيا، مش شرط تكون تعبان علشان فقير، لكن فيه مناطق ثانية
ممكن تتعبك، أنك تكون خايف تعبان همدان بـ يقول الجابرى:

الواحد..

خايف ومرتبك

الواحد..

تعبان وهمدان وما عندوش روح للمناقرة

أسلوب الجابرى فى الكتابة مع أنه بسيط إلا أنه بـ يدور
حول أفكار فلسفية كثيرة، بـ يتكلم عن الإنسان فى حالاته المختلفة، بـ يتكلم بشكل
عميق عن حياتنا العادية لكن بأسلوبه هو، ممكن يكلمك عن نفسك وأنت قاعد لوحدك، لكن
من خلال كاميرا تصوير بـ تصورك من فوق، ممكن يكلمك عن علاقتك بالبنت اللى حبتها
ويلخص العلاقة كلها فى:

اللى أنا وهي اتفقنا

نحمى بعض م اللى جاى

نفذت وعدها معايا

بس نسيت

تحمينى منها ومنى

بـ يقدر مجدى الجابرى يصنع علاقات غير عادية من أشياء
عادية، بـ يقدر من خلال لغة شعرية متميزة يتكلم عن تفاصيل بسيطة لكنها بـ تصنع
مشهد شعرى يتكلم عن تكتكة الآلة الكاتبة، عن دخان سيجارة الكليوباترا، وعن علاقة
ده باللى لحقه من جسمه قبل ما يتبعتر فى دوامة الحياة والشغل، بـ يصنع حكايته
الخاصة علشان تبقى حكاية كل واحد مننا يقدر يحكيها لنفسه قبل ما ينام. بـ يجبرك
الديوان أنك تحترم الشاعر خاصة لما يتكلم عن نفسه فـ يقول:

أنا

قسطين لبن رضعتهم من أمى مع تلات تشوله

من الحنان واللهفة على أول ولد نجا من مذبحة

الحصبة اللى حصدت قبليه تمن ولاد وتلات بنات

بلغة سهلة ورقيقة وطرق كتابة جديدة وحس شعرى جميل بـ يأخذك
الديوان لمناطق كثير عن الحياة وبـ يكتب للحياة وللإنسان فى 17 قصيدة منها:
“الهدوم”، “فيلم فى المسابقة الرسمية”، “الواحد”، “كهنوت”،
“شتوية”.