The Definitive Guide to Living in the Capital , Cairo , Egypt

بنتعرض في حياتنا اليومية لمواقف كتير بنبقى محتاجين نستشير فيها محامي، ومابنبقاش عارفين حقوقنا القانونية، وعلشان كده قررت الكاتبة “رشا صبري” تقدم كتابها الجديد “القانون لا يحمي المغفلين”، واللي ممكن نقول إنه روشتة بتعلمنا الثقافة القانونية بطريقة بسيطة وسهلة.

الكتاب الصادر عن دار تويا للنشر والتوزيع، بتقول الكاتبة في مقدمته: “بعد نجاح تجربتي الأولى كتاب قانون حواء واللي كان بيناقش كل القوانين اللي تخص الستات ويعرفها أزاي تأخذ حقها في المجتمع من غير ما تستقوى على حد وفي نفس الوقت ماحدش يقدر يستقوى عليها، قررت أكرر التجربة بس المرة دي اتكلم عن القانون في كل مجالاته، وإزاي المواطن المصري راجل أو ست يعرف حقوقه، وأزاي يعرف يتصرف لو واجه أي مشكله قانونية في حياته اليومية، والأهم يبقى عنده ثقافه قانونية تعرفه إللي ليه واللي عليه”.

وفي الغلاف الخلفي للكتاب مكتوب: “القانون لايحمي المغفلين، جملة صحيحة بشكل كبير علشان الجهل بالقانون مش عذر ومش هيعفيك من المسئولية، كلنا مغفلين ومافيش حد كبير أنه يتعلم، وانطلاقًا من مبدأ الوقاية خير من العلاج، قلت في الكتاب عن كل حاجة ممكن تقابلك في حياتك اليومية، هاعرفك الخطوات القانونية لأي مشكلة ممكن تقابلك، وهاقولك كمان إزاي تعرف النصاب قبل ما تتورط معاه”.

وبتكمل الكاتبة “رشا صبري” في كلمة الغلاف الخلفي وبتقول: “هتعرف معلومات قانونية لأول مرة، وحقوقك وحقوق ولادك في الدستور، هتعرف كمان إزاي تخلص أوراقك من غير محامي، وتعرف حقوقك وواجباتك، وكل ده مكتوب بالعامية وبطريقه مبسطة وسهله جدًا”.

وبتنصحك الكاتبة إنك “ماتخترش تلعب دور المغفل في رواية أحدهم، خليك دايمًا واعي وفاهم اللي ليك واللي عليك، وبرغم أن في حالات قليلة القانون بيحمي فيها المغفلين، بس ده مش مبرر يخليك تقع في الغلط، والكتاب بيقدم نصايح ومعلومات قانونية بالعامية لكل المشاكل اللي ممكن تقابلك في حياتك اليومية، وكمان بيفهم المواطن المصطلحات القانونية المعقدة بشكل بسيط، والكتاب بيقدم جرعة قانونية مكثفه بشكل مبسط”.

مؤلفة الكتاب هي باحثة قانونية ومحامية بالاسئناف.

الكتاب متاح حاليًا في أغلب مكتبات وسط القاهرة.