انشر كتابك بشكل إلكتروني.. في 3 خطوات بس
Mohammed Sabry
بتحب الكتابة؟ عملت كتاب أو رواية وعاوز تنشرها ومش عارف؟ واحترت ما بين دور نشر كتير بتعقد عليك الموضوع؟ أو بتطلب منك فلوس كتير؟ ولا يهمك يا سيدي، دلوقتي تقدر تنشر كتابك أو روايتك أونلاين في 3 خطوات بس. وبتكلفة لا تذكر. وكمان تقدر تحقق منها ربح معقول. كل ده بتقدمه لك دار AG للنشر الإلكتروني.
الفكرة:
صاحب الفكرة هو عمرو سليمان، مسؤل تعاقدات دور النشر في شركة فودافون. إحنا في كايرو 360 تواصلنا معاه، وعرفنا إن من خلال شغله عرف المشكلة اللي بيقع فيها كتاب كتير بسبب صعوبة نشر الكتب بتاعتهم، لأنهم مش معاهم فلوس كفاية أو مش معروفين. وحب يشوف طريقة تساعد كل كاتب يتغلب على المشكلة دي. فقرر إنه ينشر الكتب بشكل الإلكتروني. من خلال دار AG للنشر. وبكده وفر على أي ناشر إنه يدفع فلوس كتير لدار نشر في كتاب، وممكن مايعملش مبيعات.
منصات النشر:
دار AG بتنشر الكتب على منصات كتير زي: حكاية وكتبي، وغيرها كتير. كل الكتب بيتم نشرها بأسعار قليلة جدًا. لو عملت مبيعات كويسة ممكن يتم طبعها. ولو ماعملتش يبقا الكاتب ماخسرش حاجة.
الكتب كلها بتنزل على نظام أندرويد وIOS. لأنها لو نزلت على نظام ويندوز بتبقا معرضة للسرقة. فبالتالي مش هتعرف تنزلها على كمبيوتر أو تابلت أو حتى ويندووز فون.
الأسعار والأرباح:
سعر الكتاب بيتحد ما بين الدار والكاتب، على حسب أهمية ونوعه: لو رواية – نصوص – أشعار – إلخ. والأرباح بتتقسم كل 6 شهور مناصفة، بين الكاتب والدار.
بفكرة سهلة وبسيطة يقدر دلوقتي أي كاتب ينشر الكتاب بتاعه بدون مشاكل. تقدروا تعرفوا أكتر عن دار AG من هنا.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
