بتستخدم المترو يوميًا؟ 5 كتب لازم يكونوا في شنطتك
Rasha Zeidan
كتير بيبقى الوقت ما بين محطة المترو اللي عايز تنزلها، والمحطة اللي ركبت منها ممل جدًا، وساعات بيبقى الواحد زهقان، ومش عارف يعمل إيه.
عمومًا عندك مجموعة أفكار تقدر تعملها لحد ما المحطة تيجي، الأول إنك تقعد تلعب على الموبايل بتاعك، أو تتصفح مواقع التواصل الاجتماعي، والتاني ممكن تقعد تتفرج على الناس حواليك، والتالت إنك تقعد تتخيل كل واحد بيفكر في إيه، يعني تعمل سيناريو لكل واحد، ده هيروح ينام، وده هياخد شاور ويقابل صحابه، ودي زعلانة من حبيبها، وكده، أما الحل الرابع فده موضوع مقالنا النهارده..
النهارده هنرشح لك 5 كتب خفيفة وسهلة وتقدر تقراها في المترو وأنت مبسوط، يعني بدل الزهق والملل، اقعد اقراهم وانبسط، بس إحنا أخدنا بالنا في اختيارنا إن الكتب دي لازم تبقى خفيفة وقطعها صغير مش كبير، علشان تعرف تتحكم فيها، وكمان مريحة للعين، علشان (هزة) المترو..
بيضة مان
الكاتب: كيرلس بهجت..
“فيه حاجة في علم المنطق اسمها “مغالطة الاستدلال الدائري””..يعني مثلًا نقتنع أن المؤلف ده عظيم علشان هو بيقول علي نفسه كدة!!.. أو نصدق أن الكتاب ده أعظم كتاب في الدنيا علشان مكتوب جواه إنه أعظم كتاب في الدينا!! .. ونبقي مقتنعين بصحة وجودة الأفكار لمجرد تزكية مبدعيها ليها! فنظريًا من السخف والعبث إني أفضل أشكر في كتابي علشان ده ضد المنطق” ده اللي قاله كيرلس عن كتابه.
الكتاب ساخر بزيادة، ومش كبير، بيتكلم عن الشعب المطحون اللي بيعتمد على البطل الخارق أو الزعيم القائد اللي حينقذه.
أرض البامبرز (شت لاند 2)
الكاتب: محمد راضي..
الكتاب عبارة عن سكريبتات كلها فيها تسلسل بيخليك تضحك لحد ما عنيك تدمع، وكمان مع إن الموضوع سلس قوي، بس بيخليك مركز جدًا، زي الاسكريبت ده..
– أنت صحيت يا أستاذ؟
– أنت مين؟!
– أنا اللي سرقت موبايلك من كام يوم وكلمتك علشان تبعتلي ألفين جنيه وأرجعهولك
– طيب مانا سيبت لك الفلوس مكان ما اتفقنا.. رابطني كده ليه بقى؟
– مانا جايلك في الكلام.. بعد الموبايل ما اتسرق بكام يوم فيه واحد ابن حلال كلمك وطلب منك 20 الف جنيه عشان يرجعلك عربيتك.. صح؟
– أيوة صح.. بس أنت عرفت منين؟!
– ماهو أنا ابن الحلال اللي كلمتك
– بس أنت مش ابن حلال ولا حاجـ….
– لا أنا ما اسمحلكش.. زي ما بحترمك تحترمني.. أنا لو مش ابن حلال مكنتش رجعلتك عربية تمنها مليون جنيه مقابل 20 ألف بس
– أنت ما سرقتش العربية أصلًا، ولا حركتها من مكانها، أنا كنت راكنها في الشارع تحت بيتي وأنت غطيت العربية واتصلت بيا تطلب فدية! يعني ما بذلتش مجهود تستحق عليه 20 جنيه حتى مش 20 الف!
– طيب بذمتك أنت لما نزلت الشارع لقيتها؟
– هلاقيها إزاي وأنت مغطيها؟
– مش ده السبب الوحيد.. السبب الأقوى إني قدرت أقنعك إن العربية اتسرقت.. فعقلك الباطن صورلك إنها مش موجودة لإني نجحت في السيطرة عليه، فكنت بتدور وأنت من جواك مقتنع غنها اتسرقت ومهيأ نفسيًا إنك تدفعلي الفلوس، وعلشان كدة مالقيتش العربية
– أنت خريج ايه؟
– خريج طب نفسي.. بس لاقيت الطب النفسي في مصر مش جايب همه قولت أستغل دراستي في حاجة مفيدة.. بس إيه رأيك؟ عجبتك الفكرة صح؟
الغطا والحلة
الكاتبة/ رحاب هاني
خمس حاجات هاتخليك تقرا الغطا والحلة..
- إنها بتكتب بعامية سهلة وبسيطة كإنها بتكلمك.
- بتستخدم أكتر من أسلوب زى (الحوار – مقابلة بين شخصين – وصف مشاهد – تحليل – قراءة لحاجات بنعيشها – عرض وجهات نظر).
- الكتابة بسيطة وطالعة من قلب تجارب كتير.
- اختيار مواضيع مرتبطة بالشباب.
- اختيار مضمون قليل اللي بيكتب فيه.
أكواريل
للكاتب/ أحمد خالد توفيق
مجموعة قصص بتتكلم عن الخوف، مافيش حاجة تانية غير الخوف.. هنعرف كل حاجة عن القصيدة اللى بتكمل نفسها.. الرواية اللي اتكتبت بأرواح الموتى.. الطبيب اللي بتزوره ضحاياه في عيادته.. هنعرف سر المدينة الفضية.. قصة الشاب وعلاقة الحب ما بينه وبين الجثة المتعفنة.. اللوحة اللي بتتغير كل دقيقة.. المهم تخلي بالك قبل ما المترو نفسه يختفي وتلاقي نفسك في عالم تاني، قبل ما محطتك تيجي.
ديوان مركب ورق
للكاتبة/ كوثر مصطفى
كوثر مصطفى هي واحدة من الشاعرات اللي عملت كتير من الذكريات، كلماتها اترددت في كتير من أغاني الكبار زي محمد منير بالذات، وحنان ماضي وغيرهم، في كتاب مركب ورق، هتقرا كلمات أغاني سمعتها، لكن لما تتقري ده موضوع تاني، هتسرح في ذكرياتك مع كل أغنية، لحد ما محطتك تيجي، بس إوعى تسرح ومحطتك تفوتك، هتقرأ في الكتاب (علي صوتك بالغنا – سو يا سو – ساح يا بداح – شدي الضفاير – مركب ورق – يا عيني عليكي يا طيبة).
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
