The Definitive Guide to Living in the Capital , Cairo , Egypt

قرر الشاعر المصري عصام بطاح إنه يقدم لجمهور معرض الكتاب في دورته الـ 51 فكرة مختلفة، وهي ديوان شعر بعنوان “هذا الديوان فاضي”، الصادر عن دار ناس للطباعة والتوزيع.

عنوان الديوان كان سبب في استغراب ناس كتير من جمهور المعرض، خصوصًا إن الديوان فعلًا فاضي، يعني كل صفحاته بيضاء، وبالتالي أنت بتشتري حاجة أقرب لأجندة منها لديوان شعر.

لكن عصام بطاح كان عنده هدف من تنفيذ فكرة الديوان ده، إيه هي الفكرة؟ ده اللي هنعرفه في السطور الجاية.

في الأول مهم تعرفوا إن الديوان بيتم توزيعه مجانًا في المعرض لكل اللي مهتم بيه، والهدف منه محاولة اكتشاف الموهوبين والمبدعين من الشعراء المغمورين اللي مش قادرين يصدروا كتاب أو ديوان خاص بيهم.

وقال “بطاح” إنه ببساطة شديدة كل اللي يلاقي في نفسه الموهبة يقدر يكتب نموذج من أعماله داخل الديوان ويبعتها للعنوان اللي مكتوب داخل الديوان أو يتصل تليفونيًا بالرقم المكتوب وهيلاقي حد يساعده.

وأضاف “بطاح” أن كل الموهوبين والمبدعين وأصحاب الأفكار غير التقليدية اللي هيتفاعلوا بإيجابية مع الديوان ممكن يجمعهم ديوان واحد أو دواويين منفصلة في معرض الكتاب فى دورته الجاية، وده بالتنسيق مع بعض دور النشر والتوزيع علشان يكتبوا بأقلامهم مرحلة جديدة من الإبداع في الشعر والفكر والأدب.