The Definitive Guide to Living in the Capital , Cairo , Egypt

من الحاجات المبهجة في مكتبات القاهرة هي الكتب الشبابية، واللي أصبحت موجودة على رفوف المكتبات وبتنافس من حيث الجودة والمبيعات كتب كبار الكتاب المصريين، ومن الكتب دي  “كنت طفلًا قبطيًا في المنيا”، واللي صدر مؤخرًا عن مؤسسة مجاز الثقافية للترجمة والنشر، للكاتب مينا عادل جيد، وهو من تقديم الدكتور سعيد المصري، أستاذ علم الاجتماع، بجامعة القاهرة، والأمين العام السابق للمجلس الأعلى للثقافة.

في الموضوع ده هنعرفكم على 7 معلومات عن الكتاب:

1 – مؤلف الكتاب مينا عادل جيد هو كاتب مصري شاب مهتم بالكتابة عن زوايا مختلفة، صدر له قبل كدة كتابين وهما: “استحمار كوكب الفيسبوك”، و”يوتوبيا السوشيال ميديا”.

2 – كتاب “كنت طفلًا قبطيًا في المنيا” بيحكي عن جزء مهم من حياة المؤلف لما كان طفل بسيط عايش في محافظة المنيا بصعيد مصر، والمحافظة دي فيها عدد كبير من المصريين المسيحيين، لكن الكتاب مش ديني في الأساس، لكنه كتاب عن مصر المصغرة اللي في محافظة المنيا. باختصار هو كتاب مصري جدًا، ومن الحاجات المميزة في الكتاب إلى جانب القصص هو لوحة الغلاف اللي رسمها الفنان إبراهيم البريدي.

3 – سعر الكتاب 60 جنيه وموجود في مجموعة كبيرة من مكتبات وسط القاهرة، زي مكتبة تنمية في شارع هدى شعراوي، ومكتبة سنابل في شارع صبري أبو علم، ومكتبة ليلى في شارع جواد حسني، كمان متوفر على موقع النيل والفرات.

4 – مقدمة الكتاب كتبها الدكتور سعيد المصري، وتناول فيها أسباب ندرة الأعمال اللي بتتكلم عن حياة الأقباط المصريين، ووضح لنا أهمية الكتاب في علم (الأنثروبولوجيا) الثقافية، ووهو العلم اللي بيساعدنا على فهم الإنسان من حيث كونه عضو في مجتمع له ثقافة معينة.

5 – بيحتوي الكتاب على 18 حكاية بطلها الأساسي هو الإنسان المصري الأصيل. بنتعرف من خلال الصفحات على حكاية أسرة مصرية قبطية عايشة في محافظة المنيا، خلال الفترة من 1993 إلى 1999، وبنتعرف على عادات الأقباط المصريين في الوقت ده، ومعتقداتهم الدينية والشعبية.

6 – من أهم حكايات الكتاب هو حكاية مولد العدرا في جبل الطير في مركز سمالوط بالمنيا، وبيحكي مينا عن أصل المولد ده، وعن الأماكن الأثرية في القرية دي.

7 – بنتعرف من حكايات الكتاب كمان على أصل حكاية وشم الصليب في يد الأقباط المصريين، وحكاية عيد الغطاس، وأصل حد الزعف أو السعف اللي بيحتفل بيه الأقباط يوم الأحد اللي بيسبق أحد القيامة، كمان بنعرف معلومات عن الجمعة الطويلة أو الحزينة اللي بتختم أسبوع الآلام وبتسبق عيد القيامة، ده غير حكايات الشفاعة والنذر والمعجزات والحسد.

باختصار شديد.. الكتاب يستحق فعلًا يكون في مكتبة كل المصريين.