سالم الشهباني.. إن شوفتوا هذا الشخص أرموا عليه السلام
Ahmed Abd El Gawad
سالم الشهباني، شاعر ابن بيئته، وابن ناسه، بدأ رحلته من الجامعة، بيكتب عن البنوتة أم فيونكات، ووصل لحد الشهرة، وبقى من المعروفين على السوشيال ميديا، وليه حفلاته الخاصة، في أماكن كتير، وغنى أغانيه مجموعة كبيرة من الفرق والمطربين، كان آخرهم المطرب الكبيرعلي الحجار.
سالم شاعر بيحب الشعر، ومخلص ليه، فضل يشتغل على نفسه، في رحلة طويلة لحد ما بقى يستحق لقب.. الشاعر.. تعالوا نتعرف على الرحلة دي في حوار كايرو 360 مع الشارع سالم الشهباني.
(زى صدفه.. زى وش البنت أبيض شمسه طَله.. من بعيد
زى كلفه.. فى الشراب
ورده بتصاحب.. كتاب
إيد تعدى إيد فى شارع.. طير بيهرب م الحديد)
ليه قررت تكتب شعر؟
موت والدي كان السبب إني اكتب شعر. كتبت علشان أقول لوالدي ولعيلتي الصغيرة إني بحبكم.
سالم الشهباني حلم بدأ من الجامعة واستمر لحد دلوقتي، لو طلبنا منك تختصر الحلم ده في 5 محطات سريعة.. هتقول إيه؟
أولًا مرحلة الجامعة، ثانيًا صدور ديواني الأول وسفري للمشاركة في المؤتمر الدولي للشباب بسلطنة عمان 2006، ثالثًا جماعة آدم الأدبية وتأثيرها في تشكيل ذائقتي الأدبية و الفنية، رابعًا جائزة الدولة التشجيعية،خامسًا العمل مع فنان كبير بحجم علي الحجار.
هل أصولك البدوية أثرت في لغتك وشعرك؟
التأثير الأكبر طبعًا كان للبيئة البدوية، عشان هي اللي خلت للي بكتبه خصوصية وتميز.
(زى تمر النخل عالى
زى ماء النهر حالى
مين وحى لى…
أخوض وحالى؟
وأبقى عُرضه لليالى
كل ما ألمح بس طيفك
قلبى يفرح
فرحة البيت اللى زغرط لما شاف.. ساعى البريد)
رأيك إيه في ظاهرة السوشيال ميديا وهل بتصنع شاعر؟
السوشيل ميديا بتصنع ظواهر، لكن الشاعر يصنعه التراكم والخبرات الثقافية، وبشوف أنه من الضرورى التعامل مع أدوات السوشيال ميديا لكي تصنع لك انتشارًا، لكن لابد أن تكن شاعر حتى لا تصبح ظاهرة تنقضي بانقضاء الغرض منها.
كلمنا عن تجربتك مع الصحبجية.. وديوان بيلم مجموعة من أفضل شعراء مصر؟
ليس هناك أفضلية لشاعر على آخر، الشعر مثله مثل أي فن يخضع للذوق، ولسنا في طابور نخضع فيه للترتيب كل شاعر لديه ما يميزه، تجربة الصحبجية بالنسبة لي كانت تجربة مهمة، لأنها أتاحت ليا التعرف علي جيل أصغر مني تشكل ولم أكن أعرفه.
شعر العامية ليه وجود خارج مصر وفي الدول العربية ولا الفصحى أكتر؟
بالطبع له وجود ووجود قوي وذلك لأن العامية المصرية هي علي عكس كل العاميات الأخرى لها انتشار واسع تحقق بسبب الفن والسينما المصرية التي أثرت في جميع البلدان العربية علي مدار اكثر من خمسين عاما.
ولكن إن نظرنا إلى ما يتم من ترويج لشعر الفصحي من خلال المسابقات والجوائز، ستدرك أنه بالرغم من الحضور الطاغي لشعراء العامية إلا أنهم يتجاهلونه عن عمد لصالح شعر الفصحى، بحجة إنه غير مفهوم وهذا غير صحيح، والشاهد حب الشعوب العربية لشعراء أمثال جاهين،حداد،الأبنودي،نجم، وغيرهم الكثير، وكمان ضيف حب الشعوب العربية لأغاني أم كلثوم، وعبد الوهاب، وعبد الحليم حافظ، وغيرهم.
كلمنا عن تجربتك مع كتابة الأغنية إزاي بدأت؟
أنا بكتب من فترة كبيرة لفرق مستقلة وليا أكتر من أربعين غنوة، مع الفرق دي، وأخيرًا شاركت في ألبوم الفنان الكبير علي الحجار بخمس أغاني. وانتظر العمل مع منير، وأنغام، وشيرين.
كان ليك تجربة خاصة مع الفنان علي الحجار؟
الفنان علي الحجار أحد الذين آمنوا بما أكتب وتعاوني معه كان بمثابة دفعة قوية لمشروعي في كتابة الأغنية.
نصيحة للشعراء الشباب؟
لا تنشغل بما تري من ظواهر شعرية تشبه بعضها البعض، وانشغل بأن تكون شاعر لايشبه إلا نفسه.
(اللى شوفته زاد وكفى
إيه هينقص أو يزيد؟
الحياه مرت بخفه
زى صدفه
زى وش البنت أبيض شمس طاله من بعيد)
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
