The Definitive Guide to Living in the Capital , Cairo , Egypt

كتاب “سعاد حسني بخط يدها” للكاتبة والصحفية ولاء جمال، أحدث كتاب صدر في مكتبات القاهرة، ونقدر نعتبره محاولة صحفية محترفة للغوص في أعماق سندريلا الشاشة الفنانة الراحلة سعاد حسني.

الكتاب صادر عن دار بتانة، ورأينا إنه تجربة جديدة مختلفة عن كل اللي اتكتب عن السندريلا، ومن خلال الصفحات نجحت الكاتبة تعيد تعيد تقديم سيرتها وتجربتها الفنية الثرية بشكل مختلف خالص عن كل الكتب التانية اللي تناولت حياة سعاد حسني.

بتقول الكاتبة عن كتابها “حاولت أن أقدم عملًا جديدًا مختلفًا عن كل الأعمال التي تناولتها، ففي كتابي الجديد، سنسمع نبضات قلبها إلى الله بخط يدها فنشعر بروحها التي أخفتها في حياتها، وبعد رحيلها تغافل عن رؤيتها الكثيرون إما عن تعمد أو غفلة وعدم دراية، فهذه الروح الآسرة التي كانت تطل علينا علي استحياء من بريق عينيها”.

اللي بيميز الكتاب إنه لأول مرة بنشوف كل مشاعر وتفاصيل سعاد حسني الإنسانية بخطها، وطبعاً ما فيش أصدق من خطها علشان نعرف حكايتها الحقيقية.

الكتاب بيحتوي على صور خاصة لشقة سعاد حسني كاملة بكل محتوياتها، وتفاصيل عن مصاريفها الشخصية واليومية ودخلها الشهري بخط أيديها، وكمان خطة علاجها كاملة في لندن وتفاصيل تانية كثيرة بنعرفها لأول مرة عن سعاد حسني.. أخت القمر.

وبنعرف لأول مرة معلومات عن علاقة سعاد بوالدتها، وإزاي كانت بتتعامل معاها بإنسانية شديدة، وبنتعرف كمان على علاقتها بأزواجها ومحبيها وجمهورها حتى مجانين سعاد إزاي كانت بتتعامل معاهم.

وبنشوف كمان تفاصيل رحلتها للندن قبل موتها واللي كتبتها بخط إيديها، وهنعرف تفاصيل بتؤكد عدم انتحارها وعشرات التفاصيل الإنسانية التانية.

عجبنا جدًا غلاف الكتاب، اللي عليه صورة نادرة وجديدة لسعاد حسني وهي في مرحلة مهمة من حياتها. مرحلة تألقها الفني وشبابها. والغلاف من تصميم الفنان محمود البدري.

بنرشح الكتاب بقوة لكل الناس اللي بتحب كتب السيرة الذاتية، وطبعًا كل عشاق السندريلا وأفلامها الجميلة اللي بتعتبر من أهم أفلام السينما المصرية.