The Definitive Guide to Living in the Capital , Cairo , Egypt

تقريبًا ما فيش شخص من مواليد الثمانينيات وأوائل التسعينيات، لم يمر عليه كتيب من كتيبات رجل المستحيل أو ملف المستقبل، أو حتى سافاري وما وراء الطبيعة. البعض لفت نظره اسم الناشر المحاط بأقواس صفراء اللون، وهو نفس الناشر اللي بينشر كتب سلاح التلميذ الشهيرة، بنتكلم هنا عن المؤسسة العربية الحديثة للنشر والتوزيع.

المؤسسة العربية الحديثة تأسست سنة 1960، لكنها حفرت اسمها بحروف من نور في نفوس محبي القراءة، من خلال مجموعة من كتب الجيب اللي صدرت في أواخر الثمانينيات حتي أوائل التسعينيات.

الروايات قدمت قصص بوليسية من خلال سلاسل رجل المستحيل اللي بتحكي عن مغامرات رجل المخابرات المصري “أدهم صبري” اللي بيواجه منظمات الجريمة وأجهزة المخابرات الأخري والمكتب رقم 19. وروايات مرعبة من خلال سلاسل ما وراء الطبيعة اللي بتحكي عن مغامرات العجوز رفعت إسماعيل في عالم الأشباح والأرواح بالإضافة لروايات عالمية مترجمة من خلال سلسلة روايات عالمية للجيب. تقريبًا المؤسسة غطت كل جوانب الأدب من خلال مطبوعاتها اللي تميزت برخص سعرها وصغر حجمها وتناسبها مع معظم الميزانيات أيامها.

لفت نظرنا من فترة عودة المؤسسة العربية بقوة من جديد لعالم النشر، على الرغم من وفاة صاحبها الأستاذ حمدي مصطفي من حوالي 6 سنوات، ووفاة الرسام الرئيسي للمؤسسة واللي قدر يدخلنا في عالم الروايات بريشته وهو الأستاذ إسماعيل دياب من حوالي 12 سنة.

المؤسسة قدمت في إصداراتها الجديدة تجميع لسلاسلها القديمة، في شكل مجلدات من القطع الكبير، عدد صفحات المجلد الواحد حوالي 400 صفحة، ومجلدة بشكل قوي ومتين، وتم تصميم أغلفتها بشكل إنسيابي وبسيط، وفي الوقت نفسه يفتح النفس على القراءة ويضفي على المكتبة شكل جيد جدًا.

المؤسسة العربية قدمت كل إصداراتها تقريبًا على هيئة مجلدات، لكن الإقبال الأكثر في الشراء كان علي مجلدات رجل المستحيل وملف المستقبل وما وراء الطبيعة وسافاري، وهى السلاسل اللي كانت محققة الشهرة الأكبر أيام صدورها.

على سبيل المثال بنشوف سلسلة “رجل المستحيل” في الإصدار الجديد مقسمة لعدد من المجلدات، كل مجلد بيحتوي علي 8 أعداد من الأعداد الصغيرة اللي كانت بتصدر زمان، وغلاف المجلد بيغلب عليه اللون الأسمر مع شعار رجل المستحيل بحجم كبير في المنتصف، أما مجلد ما وراء الطبيعة فلونه أبيض بالكامل مع بعض الجماجم في أسفل الغلاف، أما مجلدات سافاري فكان اللون الأزرق الغامق هو المسيطر عليها، والحقيقة أن تصميمات الأغلفة البسيطة والرائعة في نفس الوقت كان لهم أثر كبير في نفسنا.

بنعيب على الإصدارات الجديدة من المؤسسة قلة الرسومات الداخلية، وإن كانت الرسومات الحالية جيدة وبتخلينا نشعر بالنوستالجيا للماضي الجميل، لكن كنا محتاجين نشوف رسومات أكتر من كده، كمان لاحظنا أن بعض الصفحات الداخلية للمجلد فيها عيوب طباعة بسيطة.

سعر المجلد الواحد 20 جنيه وبيحتوي على 8 أعداد، وبحسبه بسيطة ولو صدر من سلسلة رجل المستحيل 160 عدد ها يكلفنا اقتناء كل روايات رجل المستحيل 400 جنيه مقسمة علي 20 مجلد.

بنعتقد أن الإصدارات الجديدة من المؤسسة العربية هيهتم بها أكتر جيل الثمانينيات والتسعينيات، واللي عاوز يعيد ذكرياته مع الإصدارات الجميلة اللي تربي عليها، أما الجيل الحالي واللي بيبتعد عن الثقافة المقروءة على حساب الثقافة المرئية، فنعتقد أنه مش هيهتم جدًا بالإصدارات الحالية، خاصة أن بعض السلاسل أصبحت غير مواكبة للعصر زي سلاسل رجل المستحيل وملف المستقبل على سبيل المثال.

لكن من ناحية تانية حسينا وإحنا بنتصفح المجلدات بالحنين للماضي، وبرغبتنا في العودة لمجتمع كانت ثوابته واضحة زي مواقف أدهم صبري، ومشاعره الرقيقة وزي عبير بطلة روايات فانتازيا، وموهبة دفينة وذكية زي د. علاء بطل روايات سافاري، أو حتي ساخر ومش عاجبه حد زي العجوز رفعت إسماعيل.