The Definitive Guide to Living in the Capital , Cairo , Egypt

وهو مين ما بيحبش "فيروز"؟ الصوت الرائع اللي جاي من القمر في زيارة مبهجة للأرض، اللي لما تسمعه لازم تشم رائحة لبنان بشكل خاص، والشام بشكل عام، الاسم المميز ده اختاره مجموعة من المثقفين (ما بين سوريين وفلسطينيين ومصريين) اسم لكيان ثقافي مهم فتح أبوابه مؤخرًا في 6 أكتوبر.

أول ما تدخل مقر مكتبة فيروز، هتحس أنك في بيتك، أرفف الكتب بتستقبلك بابتسامة وشوق، الكراسي والترابيزات بترحب بك، كل تفصيلة في المكان بتشبه صوت فيروز، دافيء، مبهج.

فيروز مش مجرد مكتبة، دي عالم حقيقي هدفه نشر الثقافة والفن والرقي، وهي إحدى مشاريع فريق هدف الثقافية، والهدف من التجربة اللي اجتمع عليها الكاتب يامي أحمد من فلسطين والدكتور سامر صوان من سوريا بتظهر في إيمان الاثنين أن زيادة عدد القراء هو مكسب معنوي كبير أهم من المكسب المادي.

الفكرة بدأت من شهر تقريبًا، والمكتبة بتقدم أنشطة متعددة، من ضمنها القراءة مجانًا دون أي مقابل يوم الجمعة داخل مقر المكتبة، وورش وندوات للأطفال، وفيه كمان محاولة جادة لتأسيس نادى للقراء وهيكون في جدول شهري لحفلات التوقيع في المكتبة.

القائمين على المكتبة بيقولوا لكايرو 360 أن مشروعهم الثقافي هدفه رد الجميل لمصر، اللي احتضنتهم من سنين، وعن سبب اختيار الإسم قالوا لنا: العالم العربي تجمع على حب فيروز، والتجربة مثال لشراكة أكثر من عربي في هدف واحد، وهو التنوير.

تقدروا تروحوا مكتبة فيروز يوميًا من الساعة 2 مساء ولحد الساعة 1 صباحًا.

وعلشان تعرفوا تفاصيل أكثر زوروا صفحتهم على الفيسبوك.