قائمة #كايرو_360 لأفضل 10 كتب في 2016
Mustafa Abd Rabu
قائمة البيست سيلر أو أكثر الكتب مبيعًا هي اللي بتحرك الغالبية علشان يشتروا كتاب معين. هي ظاهرة كويسة جدًا. لكن الملحوظة اللي عايزين نلفت الانتباه لها هي إن مش دائمًا الكتب اللي في قائمة البيست سيلر ضروري تكون هي أفضل الكتب. والقاعدة المهمة اللي لازم نهتم بيها هي إن (الرواج لا يرتبط بالقيمة) يعني مش شرط تكون الكتب المشهورة بس هي الكتب الكويسة. ممكن يكون في كتب تانية مش معروفة لكنها أفضل.
وعلشان كده عملنا قائمة خاصة بذوقنا، ومش مرتبطة بالكتب الأكثر مبيعًا. ونتمنى تعجبكم وتلفت نظركم للكتب الأفضل من وجهة نظرنا في 2016.
التجربة الفكرية لروح أمه
التسويق لكتابك مهم جدًا، ومطلوب التسويق بطرق مختلفة وفعّالة. لكن للأسف أغلب طرق التسويق في مصر مبتذلة جدًا.
كيرلس بهجت اختار واحدة من أسوأ طرق الدعاية، واختار عنوان مبتذل علشان يبقى مُلفت. وللأسف ماخدش باله إن الحاجة الوحيدة اللي ماينفعش تتغير في الكتاب هي العنوان. والأسوأ من سبب اختيار العنوان نفسه.
العنوان أساء للمحتوى الجيد جدًا. الكتاب قدم دراسات غاية في الأهمية في علم النفس. وعادة كتب علم النفس مش بتلاقي رواج بسبب الأرقام والإحصائيات والمصطلحات والتحليلات. لكن الكاتب نجح في تقديم محتوى علمي مبني على دراسات مهمة ودقيقة، بطريقة سهلة.
ومن خلال الكتاب الممتع هنعرف ليه الفيسبوك بقى مهم ومنتشر للدرجة دي؟ هنعرف أن السرّ في نجاحه أنه بيساعدنا على تقديم نفسنا بالطريقة اللي إحنا عايزنها للناس. علشان بنتكلم ومحادش شايفنا. والأهم إن الفيسبوك بيرضي غريزة تقدير الذات اللي عندنا كلنا من خلال زرار اللايك! لكن في نفس الوقت الواحد لو عنده 5000 فريند وبيجي له لايكات كتير ممكن يبقى أكتر إنسان وحيد في العالم، لأنه لوحده في غرفته وماحدش معاه فعلًا!
والبديل عن الفيسبوك وأضراره النفسية إننا نشوف أصدقائنا في الحقيقة، ونتكلم ونقعد معاهم. والتجربة أثبتت إن كل واحد فينا محتاج ما يقرب من 150 صديق لازم يكونوا موجودين في دائرة صداقاته في العالم الحقيقي، ويقيم معاهم علاقات جيدة. صحيح الرقم كبير، لكن لو معانا ربعه بس، بصداقات حقيقية أفضل كتير من صداقات العالم الافتراضي.
إذاعة الأغاني
أغلبية القراء أجمعوا على إن كتاب إذاعة الأغاني من أجمل ما كتب عمر طاهر. وتحوّلت الذكريات العادية لمواقف عميقة مكتوبة بخفة وروقان. وكأن الأغاني -اللي ساعات بتظهر صدفة- هي اللي حفرت الأماكن والناس في أرواحنا. كأن الأغاني هي المسئول الأول عن تكوين الذكريات.
والكاتب -يمكن من غير ما يقصد- رصد بحساسية شديدة تحولات المجتمع المصري في 20 سنة تقريبًا في المزيكا وفي العلاقات بين الناس.
ملحوظة: الكتاب صدر في ديسمبر 2015. ومكتوب أنه حصل على جائزة أفضل كتاب لنفس السنة. طيب إزاي العدد الكبير ده كله قرأ الكتاب وحكم عليه خلال شهر واحد بس؟!
حذاء فيلليني
الروائي المصري وحيد الطويلة قدم لنا رواية حذاء فيلليني كإضافة جديدة لمسيرته الإبداعية المتميزة. بطلها مُطاع المعالج النفسي اللي دخل السجن واتعذب وفقد آدميته وكرامته من غير أي سبب ومن غير ما يعمل أي جريمة. وكالعادة بتظهر لغة وحيد الطويلة الجميلة وبتفرض نفسها عليه وعلى القارئ. وبيظهر تمكنه في اختيار تكنيك صعب في الكتابة. وذكاءه وجرأته في الكلام عن فساد أنظمة الحكم العربية، وعن القهر والظلم اللي بيطول الجميع.
سينمانيا
الكاتب والناقد محمود عبد الشكور أصدر 3 كتب خلال سنتين (كنت صبيًا في السبعينات- وجوه لا تُنسى -سينمانيا) والكتاب الأخير أهميته أنه من ناقد مهم ومحترف وشغوف بالسينما فعلًا. والكتب من النوعية دي قليلة جدًا.
ومن البداية الكاتب كان واضح تمامًا وقال إن مهمة الناقد تجاه الأفلام السيئة والتافهة أنه يسخر منها وبقسوة، لأنها أساسًا بتسخر من المشاهد ومش بتحترمه وده اللي حصل في مقاله عن فيلم (شارع الهرم).
في نقاد كتير بيكتبوا عن السينما. لكن الكاتب حريص طول الوقت إن القارئ العادي، اللي مايعرفش أي حاجة عن النقد السينمائي يفهم هو كاتب إيه. ودي من أهم الحاجات اللي بتميزه.
وبذكاء شديد اختار الكاتب أفلام بتحكي عن الأمل، والحلم بالتغيير والسعي لحياة أفضل. زي (جانجو طليقًا) (عشم) (فتاة المصنع) (أسماء) (العطر: قصة قاتل) (المواطن كين) كلها عالجت موضوعات حساسة بلغة سينمائية عالية ومن غير شعارات ولا كلام كبير.
صلاة تشرنوبل
أهمية الكتاب ده راجعة لسببين. أولًا لأن فوز الصحفية سفيتلانا ألكسيفيتش أثار كلام كثير عن معنى الأدب، وكلها كانت مناقشات في صالح الكتابة عامة. والسبب الثاني إن الكتاب عن أضخم كارثة حصلت في تاريخ البشرية.
الكتاب عبارة عن تحقيقات صحفية وشهادات ناس عاشوا الكارثة. نقدر نقول إنها رواية ضخمة متعددة الأصوات. يعني حدث واحد وبيحكيه كذا شخص من أكثر من زاوية وبتفاصيل مختلفة.
الكاتبة عايزة توصل رسالة مهمة من خلال الكتاب. عايزة تقول إن الإنسان هو أكبر خطر على البشرية وعلى الطبيعة. مهمته الأساسية إنه يعمر الأرض، ويبنيها. لكنه دمر كل شيء بحروب عالمية اتقتل فيها ملايين، ووصل التلوث لمعدلات غير مسبوقة، كان آخرها وأخطرها التلوث النووي بانفجار المفاعل.
الكاتبة في الرواية دي تنبأت بانهيار الاتحاد السوفيتي، لما قالت إن التعتيم الإعلامي وعدم الاستعداد لحالات الطوارئ وتعيين الناس المضمون ولاءهم بدلًا من أصحاب الكفاءات هو السبب في حدوث الكارثة وفي تفاقمها، وهيبقى بعد كده السبب في انهيار الدولة كلها. وده اللي حصل فعلًا سنة 1991 والرواية اتكتبت سنة 1986 بعد انفجار المفاعل.
في غرفة العنكبوت
في غرفة العنكبوت آخر كتابات الروائي والمترجم والروائي محمد عبد النبي ونقدر نقول إنها رواية ناضجة فنيا إلى حد كبير.
الرواية تحكي عن هاني محفوظ الشاب اللي عنده ميول جنسية مثلية. بيصاب بالاكتئاب بعد سجنه سنة 2001 بعد الحادثة الشهيرة اللي عرفت بالكوين بوت.
الرواية كشفت عن عالم المثليين السري الغامض. ونجحت في إزالة الكليشيهات المتعلقة بالمثليين. يعني مش شرط يكون تم الاعتداء عليه جنسيًا وهو صغير زي ما شوفنا شخصية حاتم رشيد في رواية عمارة يعقوبيان لمحدود الموهبة علاء الأسواني. وأن المثلي جنسيًا ممكن يكون متجوز وعنده أولاد وناجح في حياته وعايش حياة طبيعية تمامًا. وكتب تفاصيل حياة شخص مثلي الجنس من غير أي ابتذال، ونقل رؤيته للحياة والحب والجمال ببراعة.
ممكن ترفض الفكرة أو تقبلها -لك كل الحرية- لكن المهم هل العمل الفني ناضج فنيًا ولا لأ؟ وهنا ابتعدت الرواية عن الأفورة وعن كل الكليشيهات.
في ممر الفئران
كل ما كتبه أحمد خالد توفيق من السلاسل وغيرها من الكتب، تندرج تحت ما يسمى Bob Art البوب آرت، يعني أدب الشباب أو أدب التسلية، أيا كانت الترجمة اللي حضرتك تفضلها.
النوع ده معروف في كل آداب العالم. ولما نقول إن ستيفن كنج ودان براون وأجاثا كريستي كتاباتهم بوب آرت يبقى أكيد هنفهم مدى أهميته. لكن البوب آرت سمعته سيئة في مصر، وده فعلًا مش من فراغ.
للأسف كل الكتاب اللي تأثروا بدكتور أحمد خالد توفيق -بلاش نقول بيقلدوه- ماعندهمش موهبته ولا ثقافته ولا إصراره.
أحمد خالد توفيق عارف قواعد اللعبة كويس، وعارف هو بيعمل إيه. وهو نفسه بيقول إن كتاباته لحد دلوقتي دي مجرد محاولات أو تجارب، في نوع جديد تمامًا على الأدب العربي.
والمرة دي نجحت التجربة إلى حد كبير في رواية في ممر الفئران. صحيح فيها نفس العيوب في المط والتطويل، وبعض المشاكل في رسم الشخصيات لكنها تظل محاولة جيدة. وجمالها إنها إسقاط على الواقع الحالي. أصبح النور ومحاولة النظر والفهم جريمة تستوجب الإعدام. وساد الظلام العالم كله. وأنظمة الحكم طول الوقت عايزة الناس تعيش في ظلام تام.
كلمات رديئة
خلينا نتفق من البداية على إن الشعر -شعر الفصحى بالذات- الإقبال عليه ضعيف جدًا، وغالبًا عندهم حق. وده لأن أغلب الدواوين اللي ظهرت مؤخرًا مكتوبة بلغة صعبة، ومش من السهل إن كل القراء يفهموها.
والفرق بين شاعر والثاني هو خياله. ولو الشاعر ابتكر صور جديدة وحلوة يبقى نجح في الاختبار. وفي ديوان كلمات رديئة نجح الشاعر العراقي ميثم راضي أنه يحقق معادلة الكتابة بلغة سهلة وابتكار صور جديدة وجيدة.
(كان جدي يجفف السنوات السعيدة
ليستخدمها في غير مواسمها)
والأهم إن الشاعر قدر يعبر عن مأساة الشعب العراقي ببراعة. وتحولت تفاصيل الحرب لقصائد مدهشة وإن كانت مؤلمة وقاسية، يفهمها القارئ العادي. اللي أول مرة يقرأ شِعر.
والختام بمقطع من الديوان يوضح حجم موهبة الشاعر وحجم المأساة.
مخرج على الطريق
في 2016 للأسف فقدنا أثنين من أهم صناع السينما في الشرق الأوسط في شهر واحد المخرج الإيراني العظيم عباس كياروستامي في أول شهر يوليو ومحمد خان في آخر الشهر. خان وكياروستامي كان بينهم صداقة عميقة قائمة على الاحترام، وبينهم أوجه تشابه كثيرة في رؤيتهم للسينما.
كتاب مخرج على الطريق كان فرصة ممتازة للقراء ولعشاق سينما محمد خان علشان يتعرفوا على رؤيته لصناعة السينما، ولتفاصيلها الدقيقة ما بين إخراج وإنتاج وكتابة سيناريو، من خلال المقالات اللي كتبها خان بنفسه من 1991 لغاية 2014.
بعض القراء اعترضوا على تكرار مقالات كثير في الكتاب (الفكرة مكررة رغم اختلاف سنة الكتابة) وفعلًا عندهم حق. وياريت دار النشر تعيد طبع الكتاب بعد حذف المقالات المكررة.
لكن في المجمل الكتاب فيه مقالات ممتعة وممتازة. وهنلاقي آراء خان في أفلام مهمة، أو في أفلام مش مشهورة لكنها أثرت فيه بشكل شخصي.
مسار الأزرق الحزين
علاء خالد شاعر سكندري من جيل التسعينيات قدم دواوين كثيرة لكن تجربته الأهم كانت من خلال إصداره لمجلة أمكنة. وأصدر رواية ألم خفيف عن دار الشروق وكتاب وجوه سكندرية وأخيرًا كتاب مسار الأزرق الحزين.
الكتاب بيحكي عن تجربة دخول الكاتب لغرفة العناية المركزة، ولإجراء عملية خطيرة بسبب خطأ طبي. الكتاب أشبه بيوميات مكتوبة بروح الشِعر اللي هنشوفها في تعبيرات علاء خالد ورؤيته لعالم المستشفى بشكل مختلف. وهنحس بارتباك شديد أثناء القراء. يمكن ده راجع لحالة الكاتب نفسه. لأنه ماكنش عارف هو دخل المستشفى ليه. ومسار الأزرق هو لون الكدمات الناتجة عن دخول الإبر في شرايين المريض وأوردته.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
