The Definitive Guide to Living in the Capital , Cairo , Egypt

كتب

كتاب السما.. حكايات علم الفلك بطريقة بسيطة وممتعة

السماء القمر الكواكب النجوم تيليسكوب شادي عبدالحافظ كتاب السما
كتاب السما.. حكايات علم الفلك بطريقة بسيطة وممتعة
بواسطة
Omar Abd-elmaqsoud

لو سألتك آخر مرة قرأت فيها عن الفلك كانت إمتى؟ غالبًا أول حاجة هتيجي في بالك هي “حظك اليوم” و”الأبراج”، وتقريبًا مش كلنا بنقرأها لأسباب كتير مش هنتكلم عنها هنا، لكن اللي مهم نتكلم عنه دلوقتي هو “كتاب السما”.. أو نقدر نقول “الدليل العملي المصور” واللي بيقدم لنا علم الفلك من الصفر بطريقة ممتعة تناسب الكل.

“كتاب السما” للكاتب “شادي عبدالحافظ” هو عبارة عن محاولة مبهجة وجريئة في نفس الوقت لتبسيط علم الفلك، أو نقدر نقول كده “كورس” مكثف هدفه تعليمنا الأساسيات البسيطة لعلم الفلك والسماء بالليل، ولوحدك من غير مساعدة من أي حد.

الكتاب بييجي في 10 فصول و450 صفحة، وبيستخدم أكتر من 200 تصميم مبسط وعشرات الصور الملونة علشان يوصلنا المعلومة المهمة والتقيلة بشكل خفيف ومفهوم.

في البداية هناخد فكرة عن أساسيات إحداثيات السماء، وبعد كده خطوة بخطوة بندخل في عوالم النجوم ونشأتها وأنواعها وطبيعة مكونات السماء التانية، زي “السديم” و”المجرات” و”الكويزارات” و”الثقوب السوداء”.

وببساطة الكتاب هيطلب مننا نطلع لسطح بيوتنا، علشان نتعلم ونعرف أماكن النجوم في السماء وأنواعها، من خلال خرائط أساسية موجودة في الكتاب، وممكن نستخدمها.  

في الفصول اللي بعد كده هنعرف معلومات أكتر عن الكواكب والأقمار، وتركيبها ونشأتها وتاريخها، بعد كده هياخدنا في رحلة معارف فلكية وتطبيق عملي نتعلم منه إزاي نرصد الكواكب في السماء، ونفرق ما بينها وما بين النجوم.

كمان بيقدم الكتاب أطلس مهم لـ “منازل القمر بين النجوم” علشان من خلاله نقدر نراقب النجوم ونستدل بيها على الطريق زي ما كان العرب بيعملوا زمان، ده غير فصل كامل ومتخصص في التلسكوبات اللازمة لعملية رصد الأقمار.

في آخر الكتاب هنلاقي ترشيحات كثيرة لأفضل البرامج والتطبيقات الفلكية وأفضل الأطالس والكتب اللي ممكن تساعدنا كهواة فلك، وباختصار، وبكل بساطة نقدر نقول إن إحنا قدام تجربة فريدة في عالم الكتب، وإن “كتاب السما” يعتبر كورس مكثّف بيجهزنا للتعامل مع السماء بالليل، وعلم الفلك، بدرجة كبيرة من الحكمة والاستمتاع في نفس الوقت.

هتلاقوا “كتاب السما” في جناح دار “كتبنا” في “معرض الكتاب” في قاعة “1” جناح “A20”.. زيارة ممتعة.

مقترح