The Definitive Guide to Living in the Capital , Cairo , Egypt

كتير بنشوف فنانيين متعددين المواهب، فنلاقي فنان بيمثل وفي نفس الوقت صوته حلو فبيغني مثلُا، أو ممكن نلاقي فنان متفوق في رياضة معينة ومحترف فيها برده، ده غير الهوايات المختلفة لكل فنان أو شخصية عامة نعرفها.. وفي الحقيقة في كتير من الفنانيين بيعيش في شخصية من الشخصيات اللي قدمها لنا على الشاشة، لكن قليل منهم اللي بيوصل لدرجة إنه يستحضر روحها، ويستلهم منها فكرة عمل أدبي، أو يكتب عنها.. وده اللي قدمه لنا الفنان المبدع “محمد جمعة” في كتابه “كله رايح” المستلهم من شخصية “عم ضياء” الشهيرة.. تعالوا بينا نعرفكم على الكتاب.

الكتاب من إصدار “دار ياء للنشر والتوزيع”، ومن توزيع شركة بوك فاليو، وهي واحدة من الشركات المميزة في توزيع الكتب.

كتاب “كله رايح” من أحجام الكتب الصغيرة (95 صفحة) وده سبب مهم يخليه من الكتب اللي هتناسب الناس اللي مابتحبش القراءة بدرجة كبيرة، أو اللي بيدوروا على كتاب خفيف وسريع يخلص في قعدة واحدة.

الكتاب بيتميز بأنه شيق بدرجة كبيرة، وبمجرد ما تبدأوا قراءته مش هتوقفوا.. من أول الإهداءات خفيفة الظل الموجودة في بداية الكتاب لكتير من الشخصيات العامة والفنانيين، زي “أحمد أمين” و”أكرم حسني” و”أحمد عز” لحد بداية الكتاب الفعلية واللي بتبتدي بـ “فصل التكوين”.

الكتاب بيحكي عن “تكوين” ونشأة وبداية شخصية “عم ضياء” اللي جسدها بإبداع الفنان “محمد جمعة” في مسلسل “الوصية” وسابت علامة كبيرة عند كل واحد فينا بجملته المشهوره “كله رايح”.

جملة “كله رايح” كانت أحد الأسباب كمان اللي ألهمت “جمعة” لكتابة كتابه الأول، وعلشان كد سماه “كله رايح” وقال في تلخيصه في ظهر الكتاب إنها “مش مجرد جملة، دي وجهة نظر اختصر بيها عم ضياء كل الصراعات البشرية”.

بيتميز أسلوب الكتاب بإنه سهل ممتنع، ورغم أنه مكتوب بالفصحى لكنه هيوصل لكل الناس بسهولة.

غلاف الكتاب فني جدًا، عبارة عن لوحة مرسومة باتقان شديد لمحمد جمعة، وهو ماسك سيجارة وبيشرب كوباية شاي، وبدرجة كبيرة الغلاف بيعبر عن فكرة الكتاب وعن اللمسة الساخرة اللي هتحسوا بيها في كل صفحة من صفحاته.

الكتاب نزل لأول مرة في معرض القاهرة الدولي للكتاب 2020، واللي مالحقش يشتريه من المعرض، هيلاقيه متاح حاليًا في معظم مكتبات القاهرة.

وأخيرًا.. الكتاب سعره 40 جنيه، وعلشان تحصلوا على نسخة منه تواصلوا مع بوك فاليو من هنا.