The Definitive Guide to Living in the Capital , Cairo , Egypt

الاسم:

مختلف… غريب.. متاخد من لغة أخرى.. محتاج تفكير وبحث علشان نعرف معناه.. عمومًا هـ نوفر عليكم.. المسيا هى الصيغة العربية للكلمة اليونانية "مسياس" واللى متاخدة من الكلمة الآرامية "مشيحا" משיחא أي Mashiach ومعناها مسيح.

الكاتب:

بدأ بروايات تتكلم عن القتل والإثارة.. وله بصمة بـ يحبها الشباب جو من الرعب والإثارة والتشويق.

اللغة:

سهلة مع أنه يجيد استخدام الفصحى.. إلا أن الشيء الناقص فى كتابته ممكن يكون تركيبات جمله.

الوصف:

زى أى روائى محترف يجيد عمرو الجندى وصف الأماكن واللحظات.. بـ يقدر يعرفك تفاصيل الأشياء ويخليك بداخلها.

الشخصيات:

ليلى الحسينى ثلاثينية ومثيرة وخبيرة فى الدراسات التاريخية وبـ تحب زوجها.. اللى هو بطل الرواية "أدهم" والأخير روائى خبير، معنى الرواية مشهور معروف وبـ يقابل مشاكل هـ تعرفوها فى الرواية وفيه المتصل المجهول ومجموعة عاهرات خاصة التركية منهن وقواد.

تحليل:

ظهر الغلاف جايب كلمة لـ "إسحاق ألياكيم" وهو رجل أعمال يهودى ملخصها أن اللى بـ يتكلم عن الحرب باسم الدين والواجب المقدس عارفين أن العالم يغلى وأن المسيحيين ضد اليهود والمسلمين ضد اليهود واليهود ضد الجميع.

هنا لازم نقف علشان نعرف إيه دور اليهود فى الرواية.. وليه اختار المسيح وليه اختار معنى المخلص فى الرواية.. هل الموضوع سيرة ذاتية للكاتب؟ هل أفكار الروايات اللى عاوز يكتبها "أدهم" ويبقى مخلد هى أفكار الروايات اللى عاوز يكتبها عمرو الجندى؟

وهل الجندى نفسه فى الخلود فعلًا وبـ يفكر فيه وعارف أن الفلسفة فى الكتابة هى طريقه للشهرة؟هل بـ يكتب على غرار "ميلان كونديرا" الكاتب والفيلسوف التشيكى اللى اشتهر عالميًا بعد ما كتب "كائن لا تحتمل خفته" وفيه فكرة فلسفية قائمة على "عودة نيتشه"؟

ليه الكتاب المشهورين بـ يختاروا دائمًا التاريخ علشان يكتبوا فيه.. هل القارئ عاوز يقرأ تاريخ فعلًا ولا أصوله هى اللى بـ تناديه علشان يعرف رأى الكاتب فى منطقة تاريخية ما… ارجعوا للفترة الأخيرة وبصوا على الروايات اللى اشتهرت هـ تلاقوا أغلبها بـ يتكلم عن تاريخ ما وعن ناس ما نعرفش عنهم لأننا ببساطة ما عيشناش معهم فى نفس الفترة الزمنية.

يا ترى مين هما رجال الإله زي ما صورهم عمرو فى روايته؟ هل هم المتدينون ولا رجال السلطة ولا اللى بـ يمتلكوا النفوذ والقوة ولا الكتَّاب؟ إيه اللى هـ يوديه تركيا وهـ يعمل إيه هناك وإيه السر اللى وراه؟ هل التاريخ اللى مكتوب فى الكتب حقيقى ولا لأ؟

المآخذ:

مع أن الرواية مشوقة.. لكن المشكلة أنه تشويق قائم على الفكرة القديمة للمجهول اللى بـ يتصل بحد ويلعب معاه لعبة فيها قتل وأوامر بأنه يعمل حاجات معينة.. يعنى اتعملت فى أفلام أجنبية كثير.. ونقول لكم اقرأوا أنتم الرواية بقى كفاية كده..