نصايح تساعدك علشان تذاكر بفاعلية
Mohammed Sabry
المذاكرة وتحصيل المواد من الحاجات المملة اللي بتقابل أي طالب. وبتحتاج تنظيم ترتيب علشان يقدر يستوعب أكبر قدر من المعلومات. تعالوا نتعرف على مجموعة نصايح عن المذاكرة بفعالية.
1- ابذل جهد أكبر
صحيح مقدار التحصيل مش بعدد ساعات المذاكرة، لكن مطلوب منك تدي للمذاكرة حقها في الوقت. ولو مش بتفهم جزء معين في وقت قليل، حاول تزود وقت المذاكرة علشان تفهمه.
2- اقفل تليفونك المحمول
لازم لازم لازم، تقفل تليفونك المحمول وقت المذاكرة، لأنه هيضيع وقتك وانت مش حاسس. كل شوية مسدج، كل شوية تشوف حاجة على فيسبوك.. وهكذا. فجأة هتلاقي الوقت عدى وانت لسه ماعملتش حاجة.
3- اختار مكان المذاكرة بعناية
حاول تخصص مكان مناسب للمذاكرة. يعني بلاش مع أصحابك لو هاتضيع وقت، بلاش أوضة الجلوس، بلاش أي مكان فيه دوشة. لازم يكون مكان هادي وجاهز للمذاكرة. بحيث تدخل تبدأ تذاكر على طول.
4- حدد وقت المذاكرة
دايمًا خليك عارف بدأت امتى؟ وخلصت امتى؟ وفاضل لك قد إيه في جزء معين؟ ده هيساعدك بشكل كبير تعرف الوقت اللي بتحتاجه لكل جزء بتذاكره. وتعرف محتاج تزود مجهودك أو تقلله.
5- اكتب علشان ماتنساش
زي ما التركيز في المذاكرة مهم، الكتابة مهمة برضه، وبتساعد في تثبيت المعلومة بشكل أكبر. حاول دايمًا تكتب المعلومات اللي بتذاكرها علشان تحصل أكبر قدر منها.
6- التغذية الجيدة مهمة
المذاكرة زي أي نشاط بتقوم به، محتاج طاقة. والطاقة بتيجي من الأكل. لازم تاكل كويس وتشرب مياه كتير، علشان تقدر تواصل المذاكرة بشكل فعال.
7- خصص وقت للبريك
ماينفعش تفضل تذاكر 5 ساعات مثلا متواصلين، لأن العقل بيحتاج يفصل ويرتاح علشان يقد يستوعب المعلومة. لازم تحدد بريك ثابت مثلا كل ساعة ونص. تقوم تشرب أو تاكل حاجة خفيفة أو حتى تحرك جسمك. وبكده تفصل علشان تقدر تواصل مذاكرة من جديد.
دي مجموعة من النصايح والخطوات المُجربة للمذاكرة بفاعلية.. ونقول مبروك على الدرجة النهائية.
اعتمد المقال على نصائح من فيديو نشره موقع “هافينجتون بوست عربي”.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
