محمود العسيلي: بعدي عن إبني أكبر مشكلة في حياتي
Cairo 360
كتبت:سارة نبيل
قدر محمود العسيلي أنه يحقق نجاح كبير بين الشباب في وقت قصير لأن أغانيه مختلفة وفيها مزيكا جديدة وحودايت قريبة من القلب، علشان كده مافيش أغنية ليه بتعدي والسلام، وعلى الرغم من نجاحه إلا أن النجاح ده كان فيه أزمات وتحديات كتير، ده غير مشاكل صعبة في حياته الشخصية بسبب بعده عن ابنه وانفصاله عن مراته وفشله في أول تجربة جواز ليه.
عسيلي هيفتح لنا قلبه ويتكلم عن كل أسراره لأول مرة في السطور الجاية.
اتعطلت في بداية حياتك الفنية لفترة طويلة بسبب شركات الإنتاج وعلشان كده قررت بعدها أنك تنتج لنفسك، كلمنا عن الفترة دي من حياتك؟
أول شركة منتجة ليا واللي اكتشفتني كان اسمها Future music وملاك الشركة دي كانوا أصحابي بس للأسف حصل بينا خلاف لأنهم كان عندهم شغل تاني وماكنوش فاضيين ليا، وكنت وقتها سبت كل حاجة في حياتي علشان أركز في الفن بعد ما اتخرجت من الجامعة وقررت إني مش هشتغل بشهادتي، ولاقيت نفسي بتعطل بعقدي مع الشركة فقررت أفسخ العقد وأدفع الشرط الجزائي اللي كان رقم خيالي بالنسبة لي لأني ماكنش معايا حتى ربعه، فاستلفت فلوس وأبويا دفع لي الباقي والحمد لله عدت على خير ودي بعتبرها أكبر أزمة عدت عليا في شغلي.
وليه ماتعلمتش من الدرس ده ومضيت عقد إحتكار مع شركة عالم الفن؟
لإني كنت لسه في بداية حياتي وعايز أشتغل وطبعًا عمري ما كنت هقدر أنتج لنفسي، والمنتج محسن جابر صاحب شركة عالم الفن صديق عزيز وإنسان رائع فقررت أمضي معاه 3 ألبومات آخرهم كان في 2012.
دلوقتي أنت بتنتج لنفسك ألبومك الجديد، قادر تخوض التجربة دي ولا صعبة عليك؟
أنا قعدت سنين أعاني من عقود الاحتكار ومشاكل شركات الإنتاج، فقررت أنتج لنفسي وهي تجربة صعبة جدًا لإني بصرف كل فلوسي تقريبًا على الإنتاج، وكل شوية رصيدي في البنك بيقل وبفكر ياتري فلوسي هترجع ولا برميها على الأرض، خاصة إني عايز أصور 3 كليبات من الألبوم فربنا يستر بقى.
وتعليقك إيه على النقاد اللي هاجموك في بداية حياتك الفنية وقالوا إن صوتك مش حلو؟
يمكن كان عندهم حق لإني لما بسمع الأغاني اللي غنيتها في بدايتي بحس إني ماكنتش بعرف أغني وبسأل نفسي “هو أنا نجحت إزاي؟” خاصة وإن مستوى هندسة الصوت في أول ألبومين ليا كان سيء جدًا، علشان كده لما بقارن أغنياتي دلوقتي بأغاني أول ألبومين بلاقي فرق كبير جدًا.
إيه أصعب أغنية لحنتها وخدت منك وقت أطول من اللازم؟
أغنية “حمد الله عالسلامة” كانت صعبة جدًا لإني كنت عايز أعبر عن إحساسها بشكل معين، وماكنتش لاقي حتى الكلام اللي يعبر عن الإحساس ده فأخدت منى وقت طويل.
إيه أغرب فرح غنيت فيه وحصل لك فيه موقف ماتقدرش تنساه؟
اتعرضت لمواقف كتير غريبة في الأفراح اللي بغني فيها، بس فيه موقف مش ممكن أنساه لما دخلت فرح وطلبت من العريس والعروسة أنهم يقوموا يغنوا معايا فرد عليا العريس وقالي “إنت النمرة مش إحنا”، وقتها اتصدمت من الرد وقررت إني ماغنيش وفعلًا سبت الفرح ومشيت فجري ورايا أهل العروسة وطلبوا مني أرجع وأغني بس رفضت وقلت لهم “عريس بنتكم قليل الأدب”.
ليه قررت إنك تطلق مراتك على الرغم من وجود طفل بينكوا؟
القرار ده كان أصعب قرار خدته في حياتي لأنه كان قراري أنا مش هي، وابني كان عنده وقتها 10 شهور بس، وكانت أزمة قوية جدًا بالنسبة لي، لإني كنت بين اختيارين يا إما أعيش مبسوط أو أحافظ على عيلتي، فاكتشفت إني في الآخر لو عيشت مبسوط هقدر أسعد ابني أكتر من إني أعيش معاه في بيت واحد وأكون تعيس، فقررت الانفصال في هدوء وماحدش عرف إني طلقت إلا لما أتجوزت تاني.
هل كان صعب عليك الاهتمام بإبنك لوحدك؟
الحمد لله مواجهتش مشكلة في الموضوع ده، بس أصعب حاجة بتواجهني إنه مش عايش معايا طول الوقت لأنه بييجي عندي في الويك إند بس وبيوصله المدرسة يوم الأحد، وباقي الأسبوع بيكون مع مامته، بس الحمد لله علاقتي بيه حلوة جدًا وبيفهمني من غير ما أتكلم، أنا بس بزعل إني مش بقدر أشاركه كل تفاصيل حياته، يعني ببقى نفسي أكون معاه في التمارين وأذاكر له وألعب معاه كل يوم بعد ما يرجع من المدرسة.
فشلك في أول جواز ليك خلاك تاخد قرار الجواز مرة تانية بصعوبة؟
طبعًا، وفكرت كتير جدًا قبل ما أخد الخطوة دي وكنت خايف أخدها والخوف ده استمر 6 سنين، بس لإن مراتي إنسانة مريحة جدًا جرأتني على قرار زي ده، وعلى فكرة هي كانت من الناس اللي بفكر فيهم طول الوقت بس كنت بقول لنفسي: “دي غلبانة ومحترمة قوي مش عايز أبهدلها معايا”.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
