The Definitive Guide to Living in the Capital , Cairo , Egypt

أستديو مصر موجود في شارع النهر بالزمالك داخل مركب نايل سيتي، وبيتكون من مطعم كبير داخله ترابيزات كتير، كان ممكن يكون توزيعها أحسن من كدة لو تم تقليل عددها شوية علشان يبقى فيه نوع من الخصوصية، لكن بغض النظر عن النقطة دي المكان تحفة.

اللي بيميز استديو مصر غير الأكل الحلو هو ديكوراته واللوحات اللي على الحوائط واللي كلها لقطات لأفلام الأبيض والأسود، يعني المكان اسم على مسمى فعلًا، تحس أنك داخل أستوديو تصوير مش بس كدة حتى الموسيقى اللي شغالة في المكان لأغانى أفلام قديمة نادرة زي الأغنية اللي كانت شغالة في بداية دخولنا المطعم للفنانة صباح “أنا هنا هنا يا ابن الحلال” وبعدها سمعنا أغنية شويكار ” الراجل ده هيجنني هيجنني” وعلى كل ترابيزة توجد قطع عليها أشهر لقطات الأفلام ومكتوب على الصورة إفيه مشهور زي على سبيل المثال لقطة من فيلم “ابن حميدو” مصحوبة بتعليق الفنان عبد الفتاح القصرى المشهورة جدًا فى هذا الفيلم وهي “كلمتى لا يمكن تنزل الأرض أبدًا”.

نيجى بقى للمنيو، الحقيقة انبهرنا من شكله، منيو فخم جدًا وغني والأكلات عبارة عن أسماء الأفلام “شباب امراة – الحب الضائع – عائلة زيزي- أمير الإنتقام – أحلام الشباب.. إلخ “

في البداية اختارنا من قائمة الأطباق الرئيسية طبق اسمه “أمير الانتقام” وده كان عبارة عن مجموعة من اللحوم والفراخ بطريقة الميكس جريل مكونة من 3 قطع شيش طاوق و3 صوابع كفتة وقطعة كبيرة لحم معاها طبق أرز بالزبيب وبطاطس محمرة، والكمية كبيرة تكفي فرد أكيل، عجبنا جدًا طعمه وطريقة التقديم، كمان الأكل ما اتأخرش وجالنا بسرعة وده سعره 145 جنيه .

الطبق التاني اسمه عالم الشباب وده عبارة عن فراخ بانيه وكباب حلة وطبق أرز مع بطاطس، بس ده كانت كميته مش كبيرة، الطعم كان مميز جدًا والفراخ معمولة صح، وكباب الحلة كان مستوي كويس واللحمة جودتها رائعة، وده سعره 116 جنيه.

طلبنا جنب الأكل سلاطة خضرة ودى سعرها “16 جنيه” عجبتنا ومحتوياتها كان فيها تنوع بشكل كبير، وعليها صوص طعمه حلو، طلبنا كمان سلطة تومية سعرها “18 جنيه” الحقيقة برضه طعمها كان مميز جدًا وعجبتنا.

حبينا نجرب حلو أستوديو مصر، اختارنا “كريم كراميل” وده سعره 24 جنيه، الطعم كان رائع ومظبوط جدًا لكن عيبه أن الكمية صغيرة جدًا غير كافية حتى لطفل صغير. طلبنا كان أرز باللبن مع إضافة مكسرات وعسل، وعلى عكس الكريم كراميل كمية الأرز باللبن كانت كبيرة جدًا، لدرجة أننا ما قدرناش نخلصه، طعمه مظبوط ومعمول بمزاج وده سعره 19 جنيه، وإضافة المكسرات 10 جنيه.

الحقيقة تجربتنا في أستديو مصر كانت تجربة مميزة ومختلفة، وأكيد أكيد هنكرر الزيارة تاني.