The Definitive Guide to Living in the Capital , Cairo , Egypt

رمضان يحب الخروجات، والخروجات بتحب اللمة، واللمة بتحب المطاعم الحلوة اللي تقدر ترضي غرورنا ورغبتنا في جودة هايلة، وخدمة مميزة، وطبعًا أسعار معقولة ما تبوظلناش الميزانية.. علشان كده.. جمعنا لكم خمس مطاعم في القاهرة جربناهم بنفسنا.. بيميزهم كلهم السعر المناسب.. يعني هتستمتع بأكل حلو وفي نفس الوقت مش هتدفع مبلغ كبير.

مشاويتش.. تجربة إفطار مميزة في الدقي

المكان بيقدم إفطار متميز، والخدمة هناك هايلة، والأسعار معقولة جدًا، كمان مشاويتش بيقدم وجبات سحور سواء أطباق أو سندوتشات، ومافيش عندهم خدمة ولا ضريبة.

ننصحكم تروحوا تجربوا المكان، علشان تستمتعوا بخروجة جديدة بجو ومود مختلفين تمامًا عن أي مكان تاني، ومش مهم تاكلوا ممكن تضربوا عصير السوبيا الحلوة، أو تجربوا باقي المشروبات عندهم.

العنوان وتفاصيل أكتر هنا.

أفيتشي: إفطار ممتع وخدمة ممتازة في الشيخ زايد

أفيتشي موجود في Sky Center Ville الموجود بين مستشفى جلوبال كير وفريش فوود ماركت، في الشيخ زايد، أول ما تدخل هتحس أن المكان صغير جدًا، لكن على العكس تقسيمته من جوه مختلفة وفيه قعدات كتير زي Open Air ومقفولة وفيه ترابيزات عادية وفيه High Tables، المكان مكون من دورين وفيه كمان أماكن مفتوحة على الفيو من خلال أزاز حواليك من كل ناحية ومكيفة.

العنوان وتفاصيل أكتر هنا.

أولديش.. مكان جميل في وسط البلد

استمتعنا بتجربتنا في المكان اللي حقيقي بهرنا بجماله وبالتنظيم الجميل وخلية النحل من الموظفين في المكان، الأكل في المكان جميل، وبيتي جدًا، ومعمول باهتمام واضح، وما تنساش تشرب قهوة في المكان ده، معمولة بمزاج، كمان الحلويات رائعة، والعصائر.

العنوان وتفاصيل أكتر هنا.

أسماك الشامي: أجمل مكان بيقدم أسماك في وسط البلد

المكان بيقدم تشكيلة كبيرة من السمك، والمكان نفسه حجمه صغير قوي، وعدد الترابيزات فيه مش كبير، حوالي خمس ترابيزات بس، رغم كده القعدة مريحة جدًا، بمجرد ما قعدنا الموظف جاب لنا المنيو، لقينا الاختيارات كتير قوي، ما بين أسماك وطواجن، وباستا وشوربة، ومقبلات. يعني هتقدر تختار براحتك، والجميل أن الأسعار مناسبة جدًا.

العنوان وتفاصيل أكتر هنا.

دوار فرح: عالم المشويات الجميل في المهندسين

  

 أكتر حاجة عجبتنا في المكان –طبعًا بعد الأكل- هو احترافية الموظفين، بيعاملوك بطريقة فيها حب واحترام لدرجة إنك بتبقى حابب تقعد شوية في المكان، وماتمشيش على طول.

تجربتنا في دوار فرح كانت إيجابية، وهنكرر التجربة تاني وتالت.

العنوان وتفاصيل أكتر هنا.