The Definitive Guide to Living in the Capital , Cairo , Egypt

كل سنة وأنتم طيبين خلاص العيد فاضل عليه كام ساعة مش أيام، بـ نختم معاكم رمضان السنة دي فى نفس المكان اللى كان فيه زمان مطعم “ديلاش – D’Lush” فى الشيخ زايد، واللى بقى دلوقت اسمه “أماديوس – Amadeus”.

موجود بالقرب من مدينة زايد 2000 وكمان من مطعم سبكترا هناك، المكان لأنه لسه فاتح جديد فمش عامل ضريبة وعامل أوبن بوفيه سعر الفرد فيه 113 جنيه بالخدمة، وده كنوع من الدعايا لهم علشان الناس تتشجع وتروح، وبالفعل لما رحنا كان فيه ناس كثير مالية المكان رغم أنه آخر رمضان خلاص.

المكان مقسم لجزئين، جزء مفتوح بره للقعدة، والجزء الداخلى اللى موجود فيه الأوبن بوفيه، قعدنا فى الجزء اللى بره، بـ ييجي لك صينية مشروبات بـ تختار ما بين خروب وقمر الدين وتمر.. إلخ، وقبل الآذان بشوية بـ تدخل تعمل طبقك، البوفيه متوسط الحجم وفيه اختيارات كثيرة، ما بين الشوربات: كريمة أو لسان عصفور، والسلاطات: فتوش أو طحينة أو زبادي أو شرائح كرنب أحمر، الأطباق الرئيسية كان فيه بطاطس مكعبات صغيرة، شيشي طاووق، ولحمة مكعبات، وكفتة، ومكرونة بالصوص الأبيض والمشروم، وشرائح فراخ مشوحة.. وأصناف ثانية، والحلو إما بـ تختار من تشكيلة حلويات شرقية أو أم على.

بشكل عام الأكل كان لذيذ وطعمه حلو، واللى كان بـ يخلص كانوا بـ يجيبوا غيره، لكن لمرحلة ما كان اللى بـ يتأخر بـ ينطبق عليه جملة “اللى سبق أكل النبأ”، كان فيه شوية تعليقات بسيطة على بعض الأصناف زي الكبدة الإسكندراني اللى كانت مشطشطة ومملحة شوية، المكرونة بالصوص الأبيض اللى كانت معجنة ومش عارفين نغرفها لأنها ماسكة فى بعضها، وأم على اللى كانت مسكرة جدًا، بس بصفة عامة الأكل كان لطيف وطعمه بيتي أوى، وكمان المشروبات.

الجرسونات خلية نحل، أى نعم فيه أوقات كنا بـ نفكرهم ثاني بالطلبات اللى بعد الإفطار بس كانوا بـ يركزوا وبـ يجيبوها، والشاشات فى كل مكان علشان تتابع اللى أنت حابه.. المكان لطيف بس أكيد لازم نزوره فى وقت غير رمضان علشان يكون حكمنا عليه منصف بعيد عن اللخبطة اللى ساعات بـ تحصل فى الشهر الكريم.

وكل عيد وأنتم طيبين!