من حق “ست الحبايب” كل الرومانسية.. 5 مطاعم لخروجة حلوة في “عيد الأم”
أكل النيل خروجات عيد الأم خروجة رومانسية خروجة عيد الأم عيد الأم فيو مطاعم
Mohamed Talaat
الخروجة الحلوة مش شرط تكون مع الشلة وبس، مافيش أحلى من خروجة مع ست الكل يوم عيدها، واللي أكيد هتتبسط من أنها تغير موود وتقعد في مكان مميز وتحس بحب وحنان أولادها وترجع لذكريات الشباب والخروجات والفسح، وعلشان كده هنقول لكم في الموضوع ده على 5 مطاعم مميزة في القاهرة لخروجة عيد الأم. وده علشان “ست الكل” تستاهل كل الرومانسية.
Fish &chips
خلينا نقول أن ده أفضل مكان لخروجة عيد الأم وهما موجودين في وسط البلد، ويا سلام لو ماما بتحب السمك هتبقى خروجة ماتتعوضش، صاحبة المطعم أصلًا أم جميلة نجحت في أنها تدخل مجال الأعمال من غير ما تقول لنفسها أنا كبرت! وروحها أجمل حاجة ما في المكان اللي بيتميز بديكورات عملتها بإيديها وورد بيزين بلكونة المطعم، ده غير الخدمة المميزة لكل الناس أهم ما فيها الابتسامة، وماتنسوش حتى لو مكلتوش اتصوروا وأكيد هتنبسطوا.
تقدروا تعرفوا أكتر عنهم من خلال صفحة الفيسبوك من هنا.
Bellaila
الفيو جميل جدًا في الدقي، والنيل هتشوفوه بشكل مختلف مع وجود قبة الأوبرا وبرج القاهرة في الناحية التانية للفيو، وعلى الجنب هيكون كوبري الجلاء العريق، وديكورات تجبركم تتصوروا صور عالمية على أرض مصرية، واستمتعوا بكل حاجة حلوة مع ماما، وبننصح أنكم تروحوا قبل المغرب علشان تلحقوا الفيو والصور وغروب الشمس، وماتنسوش فيه حد أدنى للطلبات 150 جنيه للفرد.
وتقدروا تعرفوا أكتر عنهم من خلال صفحة الفيسبوك من هنا.
Paul
من أجمل المطاعم الفرنسية في القاهرة، وقعدته وأكله وديكوره وخدمته ممتازين ويستاهلوا أن ست الحبايب تروح تستمتع بجو ممتع في عيد الأم مع اختيارات مميزة من الأكل والمشروبات والحلويات، وهما عندهم فروع في “المهندسين – مصر الجديدة – القاهرة الجديدة – أكتوبر – حدائق أكتوبر – مدينة نصر”.
تقدروا تعرفوا أكتر عنهم من خلال صفحة الفيسبوك من هنا.
Mezaj World
الكافيه ده في حتة تانية، بتروحوا له عن طريق النيل أو عن طريق البر زي ما تحبوا، والفيو بتاعهم مميز على النيل في منطقة منيل شيحة المعروفة بجمال مناظرها، وعندهم قعدات مختلفة في الديكور تناسب كل الأذواق، وتقدروا تاكلوا وتشربوا عندهم، لكن بننصح أنكم تبدأوا اليوم من أوله عندهم علشان تلحقوا الفيو المميز وتتصوروا صور تبسط ست الحبايب في عيد الأم.
تقدروا تعرفوا أكتر عنهم من خلال صفحة الفيسبوك من هنا.
River Bank Cairo
مطعم مميز على نيل القاهرة الجميل، بيتميز بالفيو مع جودة الأكل والخدمة مع رقي في التعامل، يعني من الآخر تقدروا تنبسطوا مع والدتكم في أجمل مطعم في الزمالك بيقدم خدمة ممتازة وجودة عظيمة، وماتنسوش تقولوا لست الكل كل سنة وأنت طيبة.
تقدروا تعرفوا أكتر عنهم من خلال صفحة الفيسبوك من هنا.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
