The Definitive Guide to Living in the Capital , Cairo , Egypt

كتب: رامي سليمان

عارفين الأيام اللي كل تفكيركم بيكون رايح على حاجة واحدة وهي ساندويتش برجر جامد، بس المشكلة هي الزهق من الساندويتشات التقليدية الموجودة؟إحنا كمان بتعدي علينا الأيام دي، وأخر مرة حصلت لنا قررنا نروح سلسلة البرجر النيوزيلندية “برجر فويل-Burger Fuel”، أهو مكان كويس وخلاص.

زيارتنا كانت لفرع شارع نادي الصيد، واللي حسينا فيه بالتوهان شوية علشان عندهم مدخلين، واحد منهم بيطلع على سلالم بتودي على الدور الأول، أما التاني فبيوصلك على منطقة الأكل واللي فيه باب تاني بيطلعك على السلام، بس الفكرة إن نقص الموظفين في الدور الأرضي كان عامل مشكلة.

الدور الأولاني فيه باب بيوديك لباب تاني بتدخل منه على منطقة أكل مقفولة– أو بمعنى أصح منطقة للمدخنين وده عرفناه من الطفايات اللي على الترابيزات –وأخيرًا قدرنا نوصل للكاونتر اللي هنطلب منه. ننسى شوية التوهان ونتكلم عن الديكورات البسيطة بأرضيات خشب وأسقف صناعية مكشوفة وحوائط رمادي وتنوع كويس في القعدات.

برجر فويل يعتبر خبير في البرجر المصنوع من 100% لحم بقري صافي، وبيقدم تشكيلة من ساندويتشات البرجر والإضافات اللي على كل ساندويتش فيهم، وأبرزهم هو ساندويتش (BF Monster  وده ثمنه 59جنيه) اللي يتميز بإضافاته العبقرية.الساندويتش عبارة عن عيش كبير وطري جدًا وجواه قطعة البرجر على شرايح بنجر رفيعة وعليها بيف بيكون وجبنة شيدر سايحة وأفوكادو مطحون وخس وطماطم وبصل. المفروض كمان الساندويتش يكون فيه قطع مانجو، بس الموجود فعلًا كان صوص مانجو. المهم إن مكونات الساندويتش كانت طازة وتركيبة المانجو مع البنجر عملت طعم ملهوش حل، بس المشكلة إن قطعة اللحمة نفسها كانت ناشفة وصعبة المضغ، والبيف بيكون كان الحاضر الغائب.

طلبنا كمان مع البرجر تشيزي فرايز (25 جنيه) ودي بتتقدم في علبة مليانة على أخرها. صوابع البطاطس التخينة كانت مستوية كويس مفيش كلام، بس الملح زيادة جدًا وكمان عايزة جبنة أكتر.

جربنا كمان ساندويتش كريسبي تشيكن تشارجر (40 جنيه) ودفعنا زيادة 25 جنيه عشان نخليه كومبو ونزود بطاطس ومشروب غازي.الساندويتش بسرعة عبارة عن قطعتين فراخ طرية ومقلية ببقسماط من رقائق الذرة وعليهم خضار طازة وجبنة سايحة وصوص ثوم، والكوكتيل الخرافي ده جمع بين الطعم المسكر والسبايسي مع نكهة الثوم المميزة. الساندويتش بصراحة على عكس البرجر كان حكاية. البطاطس اللي مع الساندويتش بتتعمل بصوص الثوم، وهو مين مش بيحب صوص بنكهة الثوم الجميلة؟

خلصنا مهرجان البرجر بواحد فانيلا شيك (25 جنيه) نشربه في السكة، ومخيبش ظننا بطعمه المسكر وقوامه السميك.ميلك شيك فعلًا معمول بمنتهى البساطة والتمكن.

المختصر المفيد؛ البرجر مش عصاري خالص ولا على المستوى المطلوب، بس الكريسبي تشيكن ساندويتش كان تحفة والمكونات الطازة في كل الأكل تستحق الإشادة.الفكرة بس إن 220 جنيه أكل لفردين في مطعم فاست فوود كتير شويتين.