The Definitive Guide to Living in the Capital , Cairo , Egypt

مطاعم
بيكين – Peking

بكين: الأكل الصيني اللي على أصوله في المهندسين

تم التقييم بواسطة
Mostafa Fathi Abdelfadil
قيم
قيم الآن
بكين: الأكل الصيني اللي على أصوله في المهندسين

كايرو 360 بتدور دائمًا على تجارب مختلفة تنقلها لقرائها في القاهرة، والمرة دي حبينا تكون تجربتنا بعيدة عن المطاعم اللي بتقدم أكل تقليدي، فقررنا نروح لمنطقة مختلفة وهي منطقة الأكل الصيني، ونشوف هل مطعم بكين–Peking المهندسين لسه محافظ على مستواه ولا لأ.

كتير من المطاعم الصينية في القاهرة نجحت أنها توصل الثقافة الصينية للمصريين، الأكل دائمًا هو أحسن سفير زي ما إحنا عارفين، وتجربتنا في بكين نقدر نقول أنها كانت تجربة مميزة والمطعم بصفة عامة عجبنا من حيث الديكورات اللي ابهرتنا والمساحة المعقولة والنظافة بالإضافة طبعًا لمستوى الأكل المميز.

أول ما دخلنا لاحظنا الاختلاف في اختيار الديكورات من حيث الهدوء تحس أنك سافرت في زيارة سريعة للصين، وعجبنا جدًا الإكسسوارت الصينية على الحوائط، واللوحات الفنية، يمكن تعليقنا الوحيد أن الإضاءة كانت خافتة زيادة عن اللزوم، لدرجة أنها ممكن تتعب العين.

المنيو بتاعهم بسيط جدًا، يمكن عيبه أنه باللغة الإنجليزية فقط وبدون شرح بالعربي وده ممكن يسبب مشكلة لبعض الناس، لكن الموظفين في المكان مابيتأخروش أبدًا في مساعدتك وشرح كل حاجة مش واضحة في المنيو، حبينا نجرب (فراخ مع هوت شيلى-Chicken-W.Hot Chilli) ودي سعرها 64 جنيه، عبارة عن صدور فراخ مطبوخة على الجريل مع خلطة مكسيكان فيها فلفل وبصل وزيتون وطماطم، والحقيقة كان طعمها روعة، عجبتنا جدًا، كان كل حاجة فيها مضبوطة، طلبنا معاها طبق (أرز بالبسلة( وده سعره 15جنيه، لكن ضايقنا أنه ما كانش مستوي قوي.

طلبنا كمان طبق لحم بيف مع خلطة صيني عبارة عن فلفل وبصل وزيتون وصوص مخصوص، والحقيقة أن الطبق كان رائع وكل المكونات مضبوطة، والطعم جميل، طلبنا معاه طبق رز أبيض، وده سعره 13 جنيه، وعجبنا جدًا. والجميل أنهم بيقدموا الأكل على طبق محطوط على قاعدة من النحاس مفرغة من الجوانب بفتحات داخل القاعدة دى، وفيها شمعة بهدف أن الأكل يفضل محافظ على سخونيته طول ما أنت بتاكل، من أول ملعقة ولآخر قطعة في طبقك، بالإضافة إلى أنه بيخلق جو من الرومانسية والجمال في المكان.

الموظف اقترح علينا نجرب طبق “crisp shandong vegt” وهو عبارة عن كوسة مطبوخة ومتبلة في خلطة حلوة قوي مخلياها مقرمشة كريسبي، صعب تعرف أن أنها كوسة لأن الخلطة مغيرة طعمها جدًا عن طعم الكوسة العادية، والتوابل أعطت للطبق نكهة مميزة جدًا. والطبق ده سعره 17 جنيه. جربنا مع الطبق ده “spring rolls vegetables” سعرها 16 جنيه، لكن للأسف طعمها ما كانش قد كده، وحسينا أنها كانت محتاجة تسوية أكثر.

السلاطة اللي نزلت لنا مع الأكل كانت طبق جرجير مضاف إليه قطع بطاطس مقرمشة مع مكرونة رفيعة جدًا وصوص تحفة مع الفلفل والبصل، سعرها 22 جنيه، والحقيقة كانت طازجة جدًا ونظيفة وطعمها مميزة.

تجربتنا في بكين–Peking كانت مميزة، وانبسطنا في المكان.

نصيحة 360

عندهم دليفري اطلبهم على تليفون 16078

أحسن حاجة

المكان نظيف ومستوى الأكل مميز والـ والفراخ مه الهوت تشيلي تحفة.

أسوأ حاجة

الـ spring rolls vegetables مش قد كده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح