The Definitive Guide to Living in the Capital , Cairo , Egypt

مطاعم
بورتا دورو – Porta D’oro

بورتا دورو: أكل إيطالى وزحام شديد فى أمريكانا بلازا الشيخ زايد

تم التقييم بواسطة
Angie El Batrawy
قيم
قيم الآن
بورتا دورو: أكل إيطالى وزحام شديد فى أمريكانا بلازا الشيخ زايد

رحناه من سنة وشوية فى فرع المهندسين فى شارع سليمان أباظة وكتبنا مقال نقدي، تجربتنا هناك كانت معقولة، وعلقنا على الأسعار، والخدمة الممتازة والمكان النظيف، وبالتالى لما يفتح فرع جديد فى أمريكانا بلازا الشيخ زايد كان لازم نروحه.

المطعم مكانه أقرب للبوابة الخلفية لأمريكانا بلازا، جنب مطعم "سانتوريني – Santorini"، يوم ما رحنا الدنيا كانت زحمة جدًا لدرجة ما كانش فيه مكان نقعد وأخذنا دور فى الـ Waiting List الطويلة، مافيش كام دقيقة ندهوا على اسمنا ودخلنا.

على الرغم من الزحمة الشديدة الجرسون كان مركز معانا ومتابعنا، أعطانا المنيو اللى طلبنا منها شوربة طماطم (16.95 جنيه)، ومن قسم السلاطات سلاطة خضراء (19.95 جنيه) وهى مكونة من جرجير وطماطم وكرنب أحمر وخس وجزر وخيار، ومن الأطباق الرئيسية باستا "بينا" كواترو فروماج (44.95 جنيه) فيها الأساس جبنة ريكفورد وقليل من الموتزاريلا مع الصوص الأبيض وطلبناها كمان سبايسي، وكمان فلتو جرجونزولا "بصوص الريكفورد" (84.95 جنيه) بـ ينزل معاها طلبين جانبيين اختارنا خضار سوتيه وبطاطس مخبوزة.

أول ما طلبنا نزل لنا سبت عيش فيه 4 شرايح عيش مدهونة بالزعتر وفيه بالزعتر والطماطم والزبدة كان طعمها حلو أوى على الرغم أن أطراف خفيفة كانت ملسوعة، وبعدها بشوية نزل لنا الشوربة والسلاطة، الشوربة طعمها حلو جدًا وجاءت لنا سخنة، وغنية بالطعم وكميتها ممكن تكفى شخصين، وعليها Sour Cream من فوق للتزيين، السلاطة كانت فريش ومنعشة جدًا وكميتها كبيرة لكن فى رأينا كان ينقصها Dressing خفيف لأن كل مكوناتها نواشف.

بعدها بشوية ثانيين نزلت الأطباق الرئيسية، كمية الباستا خضتنا لأنها كانت كبيرة جدًا على شخص واحد، الصوص كان حلو جدًا وكريمي وكانوا ضابطين نسبة السبايسي فيه، وعلى الرغم من كده كان واضح برضه طعم الريكفورد فيها، كانوا عاملين توازن، بس ما حسيناش بطعم أى أنواع جبنة ثانية بسبب قوة طعم الريكفورد، تعليقنا الوحيد على الباستا أنها كانت ألدنتى بزيادة، فى الأول كانت ألدنتى بس فى نص ما كنا بـ نأكل لقينا بعض من الباستا ناشفة، أما بقى الفلتو بصوص الريكفورد كان وهمي، قطعم اللحم المستوية Well-done بناء على طلبنا وغرقانة فى صوص ريكفورد لذيذ مخدومة كويس، الخضار فريش بس مقرمش خاصة الجزر، والبطاطس المخبوزة عليها برضه Sour Cream من فوق أضافت لطعم البطاطس.

ختمنا زيارتنا هناك بليمون منت (9.95 جنيه) وتيراميسو (24.95 جنيه)، الليمون بالنعناع كان مضبوط وسكره كمان مش لاذع زي ما ناس كثير ما بـ تعرفش توازنه، وكمية النعناع مش غالبة على الليمون نفسه، التيارميسو بقى كانت حكاية، محطوطة فى كأس كبيرة أول ما تنط فيها وتاخد حتة من كريمة الجبن المسكربوني الخفيفة هـ يتغير مودك خالص، خاصة كمان أنهم بدل ما مغمسين بسكويت السافويار فى القهوة كانوا حاطين كيكة شوكولاتة جواها فكانت عاملة توازن مع طبقة القهوة المرشوشة فوقها.. وممكن شخصين يشاركوا فيها خاصة لو مش دماغهم فى الحلويات اللى بالقهوة.

"بورتا دورو" كان تجربته لطيفة ومشتنا مبسوطين، ممكن الحاجات البسيطة اللى علقنا عليها دي حصلت بسبب ضغط الزحمة، بس عامة المكان لطيف لو أنت من محبي الأكل الإيطالى الأصيل.

نصيحة 360

بورتا دورو لهم صفحة على الفيسبوك.

أحسن حاجة

الفلتو بصوص الريكفورد.

أسوأ حاجة

الباستا كان بعضها ناشف مش ألدنتى.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح