The Definitive Guide to Living in the Capital , Cairo , Egypt

في الفترة الأخيرة كترت محلات ساندويتشات البرجر سواء كانت عربية أو في مطعم، بس مش أي مكان يقدر يظبط الخلطة السرية لبرجر شهي لا يقاوم مابين الحجم والطعم والسعر. فأول ما عرفنا عن افتتاح بوسطنز برجر – Boston’s burger  في شارع 9 في المعادي قررنا نروح نجربه.

المكان كبير فيه مكان مفتوح خارجي ومكان داخلي الديكور فيه واخد الطابع الأمريكي المعاصر، بحيطان بني وورد عليها، والكراسي بيضاء، أما في أول المكان ففيه ثلاجة فيها السلاطات اللي بتختارها وتقدر تحط منها أكتر من مرة، وكمان الصوص سواء باربكيو أو جبنة أو Honey mustard. وتقدر تشوف جنبهم الثلاث أحجام للبرجر اللي بيتميز بيهم المكان ما بين 250 جرام و300 جرام و450 جرام.

المنيو اختياراته متنوعة ما بين برجر اللحمة والدجاج والمقبلات والحلويات، أما المشروبات الغازية فهي Refill  كلها، بدأنا من منيو المقبلات بـ Boston’s appetizer platter وسعره 81 جنيه. واللي مكون من أجنحة دجاج بخلطة حراقة وصدور دجاج وبصل حلقات مقلي وصوابع موتزاريلا مقلية. صدور الدجاج كانت طرية وهائلة كمان أجنحة الدجاج كانت حراقة والتتبيلة بتاعتها جميلة وبرضه صوابع الموتزاريلا، بس حلقات البصل كانت محتاجة تكون مقرمشة أكتر.

بعد كده طلبنا Fudge burger  بـ 104 جنيه، وOur Famous Mega Burger بـ 86 جنيه. و Boston’s burger بنفس السعر. وسفن آب بـ 24 جنيه. الـ Fudge burger عبارة عن برجر جواه جبنة سايحة ولذيذة بس كميتها كانت قليلة شوية بالنسبة إننا طلبنا البرجر يكون 300 جرام، كمان تتبيلة البرجر كانت ناقصة وماكناش حاسين بيها تقريبًا.

أما ساندويتش  Our Famous Mega Burge فكان مكون من برجر عليه جبنة وفلفل ألوان وحلقات بصل مقلية وكان طعمه مظبوط وإضافة فلفل الألوان خلت طعمه مميز.

أما الـ Boston’s burger فكان أفضلهم وكان مكون من قطعة برجر عليها شريحة جبنة ومشروم وبيكون بس مشكلة تتبيلة الللحمة كانت موجودة برضه وكانت ناشفة أكثر من اللازم. وجربنا من بار السلاطات كول سلو وسلطة بطاطس وكانت مميزة وطعمها مظبوط.

بشكل عام أي وجبة من وجبات المكان بيكون معاها بطاطس ويدجز وسلاطة وكل أنواع الصوصات، بس نتمنى أنهم يظبطوا التتبيلة علشان نستمتع لآخر قطمة في المرة الجاية.