The Definitive Guide to Living in the Capital , Cairo , Egypt

بعد ما التعويم عومنا كلنا وبقينا بنستغنى عن حاجات كتيرة ثانوية في حياتنا وبنركز على المتطلبات الأساسية، بقت كمان نسبة الخروج والفسح –عند بعض الأسر- قليلة علشان الأسعار اختلفت وبقى خروج أسرة من 4 أفراد Budget لوحدها خاصة لو الخروجة دي غدوة في مطعم، وبالتالي لما بنلاقي مكان بيقدم أسعار منخفضة ومعقولة بالمقارنة باللي موجود في المشهد القاهري لازم نفرح به خاصة لو بيقدم كمان جودة أكل كويسة، وده اللي لقيناه في بيسترو – Bistro في فرع مدينة نصر. 

الحقيقة لما رحناه من 5 سنين وكتبنا عنه مقال نقدي كنا فرحانين برضه أن أسعاره معقولة، وبعد ارتفاع الأسعار مازال ملتزم بالاستراتيجية بتاعته أنه يقدم أطباق بجودة كويسة بأسعار أقل من المطاعم المماثلة.

المكان مازال محتفظ بالدفء في ديكوراته وأجواءه، على الحوائط هتلاقي بورتريهات مرسومة بالقلم الرصاص لفناني هوليوود غاية في الروعة، هتخليك تبص على كل حيطة علشان تتفرج عليهم كلهم، بار السلاطة صغير جدًا موجود في منتصف المطعم والجرسونات بيتحركوا زي خلية النحل ولطاف جدًا ومبتسمين.

المنيو فيها أقسام كتيرة جدًا، من الحاجات اللي مشهورين بها الباستا اللي بيعملوها في كسرولة وبيبقى عليها جبنة موتزاريلا سايحة من فوق، قسم الشوربة مافيهوش غير بس “شوربة اليوم”، سألنا عليها كانت شوربة مشروم بالكريمة (17.95 جنيه) فأخدنا واحدة، ومن الأطباق الرئيسية اختارنا برونو فييل رولز Bruno Veal Rolls بـ (76.95 جنيه) وبتختار معاها 2 طلب إضافي فأخدنا بطاطس ويدجز وسوتيه، وكمان بنا فييل كسرولة Penne Veal Casserole بـ (52.95 جنيه)، وقومنا عملنا بنفسنا سلاطة من بار السلاطة (24.95 جنيه، زيارة واحدة).

بار السلاطات الاختيارات فيه كانت صغيرة لأن حجمه صغير، كان فيه سلاطة بطاطس بالمايونيز، وروزبيف بالزيتون، وتبولة، وسيزر سلاد، وسلاطة خضراء، وزيتون مخلل وكول سلو، نقنقنا شوية في السلاطة عقبال ما ييجي الأكل، كلها كانت فريش وطعمها حلو، أول حاجة نزلت الشوربة، أهم شيء في الشوربة بالنسبة لنا هو قوامها، هو ده اللي بيحدد الشيف شاطر ولا لأ، القوام مضبوط وطعمها كريمي والمشروم مستوي كويس فيها، وكميتها كويسة وطعمها حلو جدًا.

بعد شوية نزلت الأطباق الرئيسية، نبدأ بكسرولة الباستا البّنا المكونة من قطع اللحم وصوص المشروم البني والجبنة الكريمي ومتغطية من فوق بجبنة موتزاريلا، حاجة كده وهمية أول ما تدب الشوكة في الجبنة وتمط معاك وتاكلها سخنة ملهلبة، صوص الباستا حلو جدًا بس تقيل أوي والكمية في الكسرولة ما يقدرش عليها شخص واحد الصراحة، قطع اللحم والمشروم مستوية كويس وموجودة بوفرة يمكن قد كمية الباستا.

نروح بقى على رولز اللحم المحشية، عبارة عن قطعتين لحم مشوي محشيين ببيروني وجبنة شيدر سايحة وعليها من فوق صوص الباربكيو مقدم معاها سوتيه وبطاطس ويدجز، الطبق ده عجبنا أكتر من الكسرولة، رول اللحم كان سُمكه كويس وطعم الببيرونى مع الجبنة والصوص عاملين تناغم مع بعض، القطعتين حجمهم كبير فهتشبع ده غير أن الويدجز والسوتيه طعمهم يجنن وكميتهم كبيرة، الويدجز كان عليها توابل من بره مع قرمشة الطبقة الخارجية كانوا تحفة، السوتيه فريش ومستوي مضبوط.

ما قدرناش الصراحة نجرب المشروبات والحلو عندهم لأننا كنا فطسنا من الأكل، بس أكيد هنروح تاني علشان نجربهم خاصة أن بيسترو له 3 فروع تانية في مساكن شيراتون ومدينة الرحاب وهليوبوليس.