The Definitive Guide to Living in the Capital , Cairo , Egypt

الأكل الحلو بيقدره كل الناس سواء الذويقة الأكيلة أو الناس العادية، بس الأكيد كمان إن تابلا لونا –   Tabla Luna مش بس من أحسن المطاعم اللي بتقدم أكل لاتيني لكن كمان الديكور وألوان المكان هتخليك مش عاوز تمشي حتى بعد ما تخلص أكل.

كنا عملنا مقال نقدي عن نفس المطعم فرع المعادي هتلاقوه هنا، بس تجربتنا المرادي في فرع الزمالك مختلفة ومميزة أكتر، يمكن ده بسبب إن المكان كبير حوالي 3 أضعاف مساحة فرع المعادي، ده غير إن الديكور مميز أكتر ما بين الأصفر والأحمر والأخضر، ألوان زاهية تعيشك في أجواء ثقافة أمريكا اللاتينية.

المنيو بيكون مكتوب على الحيطان، وهم كاتبينه بطول الحيطة، يعني كل ترابيزتين مثلًا هتلاقي على يمينها منيو الأكلات الرئيسية وعلى شمالها منيو المقبلات، وكان حظنا حلو في وقت زيارتنا لأن كان عندهم عصائر طبيعية مش بس كانز.   

طلبنا من المنيو تاكو (65 جنيه) من منيو المقبلات، وThe Confused Argentinian (ثمنه 65 جنيه)، وChicken enchiladas  بـ (88 جنيه)، وعصير ليمون  بالنعناع (25 جنيه) وعصير برتقال (27 جنيه).

أول حاجة وصلت كان مقبلات من المكان وهي عبارة عن تورتيلا ومعاها صوص شبه البيستو وصوص طماطم، وبعد كده وصل التاكو سخن ولذيذ وبيقرمش، ما بين طعم الدجاج اللي يجنن وخلطته اللي مُكونة من قطع بطل وطماطم وصوص شوكولاتة غامقة، طعم ياخد العقل.

بعد كده وصل Confused Argentinian وده عبارة عن قطع بطاطا مسلوقة بس قوامها ناعم جدًا وسميك أشبه بالتوفو، ومتغرقة في صوص الكريمة والسبانخ والجبنة، ودي كانت من أجمل الأكلات اللي أكلناها هناك، برغم إنها تقيلة شوية إلا إن مع كل معلقة بيتكون ما بينك وبين الطبق قصة حب ما بتتنهيش.

إحنا جربنا الـ Chicken enchiladas  و البيف كمان لأن الطبق بيتقدم 2 رول من النوع وحصل سوء تفاهم إننا كنا عاوزين الطبق الواحد فيه النوعين دجاج ولحوم بس هم بيعملوا الطبق على بعضه نوع واحد بس، ونتج عن ده إن تاني طبق بيف كان على حساب المحل وده كان شيء سعيد جدًا بالنسبة لنا طبعًا.

الـ Chicken enchiladas مكونة من 2 رول تورتيلا جواهم قطع دجاج متغرقة في الصوص ومن فوق جبنة وقطع طماطم، الطعم كان قوي ومميز جدًا. أما الـ beef enchiladas فكان أحلى بكتير برغم إن بعض القطع ممكن تكون مستوية زيادة عن اللزوم إلا إن أضافة الفاصوليا الحمراء مع صوص الطماطم والجبنة كانوا عاملين تركيبة جميلة ماتتوصفش خاصة لعشاق الفاصوليا الحمراء.

أما العصائر فكانت فريش جدًا وسكرها مظبوط وتبقى متشوق تعمل refill تاني، بعد فترة كان لازم نجرب الحلو وحبينا نجرب حاجة مختلفة، فطلبنا Torta de tres leches (ثمنه 48 جنيه) ودي عبارة عن عجينة كيكة عليها 3 طبقات لبن مكرر بطريقة مميزة وعليه طبقة لارنج.

الكيكة شاربة اللبن لدرجة إن أنت مش هتحس بإنها كيكة أصلًا، وممكن تفتكر إن كله لبن ، وطعم اللبن مع المارنج حاجة كده مايتشبعش منها أبدًا. بس بعد أكلة دسمة زي دي صعب أنك تقدر تخلص طبق زي ده لوحدك.

تجربتنا هناك كانت مميزة جدًا وأكيد هتتكرر تاني.