The Definitive Guide to Living in the Capital , Cairo , Egypt

نادرًا لما الواحد يلاقي مطعم تيك أواي يجمع بين الطعم والسعر والنظافة، لأن في الغالب لو حاجة رخيصة ما بيبقاش فيه اهتمام بالنظافة والعكس صحيح، لكن مطعم تري بيان في المهندسين قدر يحقق المعادلة دي. وده اللي خلاله ينجح ويبقى له اسم من وقت ما بدأ من حوالي 15 سنة.

فرع المهندسين موجود في أول شارع جامعة الدول من ناحية شارع السودان، أمام فرغلي، أشهر محل عصير في الشارع، المحل مساحته صغيرة إلي حد ما، وده بيخلي عدد الترابيزات قليل فمن النادر أنك تلاقي مكان تقعد فيه وده من عيوب المكان.

اللون البرتقالي طاغي على المكان زي أغلب مطاعم الأكل السريع اللي عاوزاك تاكل وتمشي بسرعة علشان غيرك ييجي ويقعد، في الصالة هتلاقي حوالي 5 ترابيزات، والحمامات قريبة جدًا منك ودي كمان حاجة سلبية تانية.

لكن ما نقدرش ننكر أن المكان له روحه الخاصة اللي طاغية على المساحة الضيقة واللون البرتقالي اللى بيتميز به المطعم، والكاونتر اللي بتطلب من أمامه بنفسك طلبك، والمطبخ اللي ظاهر في الخلية وبتشوف بنفسك إزاي بيتم تجهيز الأكل. وكعادة النوع ده من المطاعم، المنيو الورق كانت على الكاونتر أمام الكاشير، فمواجهناش مشكلة في اختيار الأكل.

حبينا نجرب الهوت دوج البكينى اللي مشهور به مطعم ترى بيان، والساندوتش ده عبارة عن هوت دوج مقطع مع خلطة الماكسيكان واللي هتلاحظ أنها بتتكون من فلفل، بصل، زيتون، وطماطم، وعليهم صوص الباربكيو الحار، والساندوتش ده بيتحضر على الجريل، والحقيقة أن طعمه كان روعة وده سعره 30 جنيه وده بيخليه مناسب جدًا بالنسبة للكمية الضخمة اللي جوه الساندوتش.

حبينا نجرب كمان الفراخ الحارة اللي أكثر من حد شكر لنا فيها، وده ساندوتش عبارة عن صدور الفراخ المتبلة في خلطة حارة، والطعم كان معقول، بس التحفظ الوحيد علي الفراخ أنها كانت حارة زيادة عن اللزوم، تقريبًا مستخدمين فيها شطة خام حامية جدًا، وده بيخلي الساندوتش محتاج عشاق الحار المخصوص فقط علشان يستمتعوا بيه. وده كان سعره 30 جنيه.

فيه حاجة لاحظناها وهي أن المطعم قلل حجم الساندوتش، رغم أن المكان أصلًا مشهور بحجم ساندوتشات بيوصل لربع متر، وده ممكن يكون بسبب غلاء الأسعار في الفترة الأخيرة.