The Definitive Guide to Living in the Capital , Cairo , Egypt

طيب الواحد يروح يسهر سهرة هادية فين في الزمالك بعيدًا عن دوشة الكافيهات والمطاعم؟ قررنا نزور “ديشز-Dishes” الموجود في آخر شارع الجزيرة الهادي على أمل إننا نكتشف حاجة جديدة مختلفة.

من أول نظرة لاحظنا إن ديشز يشبه فيلا 55 الموجود في الزمالك، من السلالم اللي بتطلع على المطعم والممر الملتوي والقعدة والشيشة والطاولة.

بعد ما وصلنا لترابيزتنا استكشفنا المنيو سريعًا وطلبنا شاي بالليمون (38 جنيه) وصودا (18 جنيه). وإحنا مستنيين قررنا نطلب طبق مقبلات يفتح نفسنا، بس الغريب إن الجرسون اختفى نص ساعة ورجع ومعاه المشروبات، وبكده كنا مضطرين نستنى كتير عشان نطلب التشيكن كاساديا (45 جنيه).

مش عايزين نكون بننتقد كتير وعلشان كده أكلنا الكاساديا اللي كانت متقطعة قطع كبيرة لدرجة إن الفراخ كانت بتقع منه. الأكل المكسيكي ملخبط شوية مش كده؟ المهم، باعتبارنا جربنا أطباق كاساديا من أماكن كتير لازم نقول إن إضافة الفلفل الأخضر هنا كانت لطيفة وبصراحة حاجة غريبة إن معظم الأماكن مش بتضيفه. بصراحة إحنا كنا محتارين بين الكاساديا وبين “هاف مون” توست والتشيكت ستريبس، بس اختيارنا كان في محله.

اختيار الأطباق الرئيسية كان مشكلة، لإننا لما طلبنا منهم طبق سالمون قالوا لنا إن كل أطباق السي فوود مش متاحة. في الأخر استقرينا على بيف فيليه (104 جنيه) وتشيكن توليدو (85 جنيه).

الميزة في ديشز إنك تقدر تعمل حاجات كتير لغاية وصول الأكل. ممكن مثلًا تلعب كوتشينة أو مونوبولي، أو تتفرج على التليفزيون ( يومها كان شغال فيلم Inception )، أو تسمع صوت الناس العالي في المطبخ.

كل الكلام ده اتنسى مع وصول الأكل. نبتدي مع الستيك العايم في صوص فلفل هايل ومستوي medium-rare صح الصح. طبعًا مش هنقدر نعلق على حجم قطعة الستيك الصغيرة عشان السعر. أما الخضار السوتيه المكون من جزر وكوسة ومشروم وبروكولي كان معمول كويس، وكمان البهارات على البطاطس المحمرة كانت كويسة.

أما التشيكن توليدو فكان ظريف، عبارة عن ثلاثة قطع صدور فراخ حجمهم كويس. زعلنا لما اكتشفنا إن الصدور ماكانتش محشية جبنة وصوص باربيكيو زي المنيو ما قالت، وطلعت الفراخ فوقهم. خلطة الجبنة الموتزاريلا والشيدر السايحة مع صوص الباربيكيو المسكر بطعمه اللاذع كانت هايلة وعوضتنا لحد كبير عن موضوع الحشو ده.

بصراحة ماكانش في مكان لحاجة تانية، لكن دائمًا في مكان لحاجة حلوة. الفرايد بانانا (39 جنيه) عبارة عن غلاف مقرمش مرشوش عليه صوص مسكّر لطيف مع بولة آيس كريم عشان تخفف من سخونية الموز المكرمل. كمية الطبق كويسة وكل واحد فينا كان من نصيبه موزة لوحدة عشان متحصلش أي حروب عالمية جديدة.

يمكن ديشز مش أحلى مكان لتقضية سهرة هادية، بس المكان ماكانش زحمة وتقدر تتكلم براحتك من غير إزعاج وكمان الأكل كويس.