The Definitive Guide to Living in the Capital , Cairo , Egypt

مكان هادي في دجلة المعادي وسط الأشجار والهدوء، كنا زرناه قبل كده وكتبنا عنه مقال في 2014 تقدروا تشوفوه من هنا. المكان بيتميز بالديكور اللي بيتشابه والديكورات البدوي أو النوبية البسيطة، عبارة عن شيلت ملونة على الأرض والحيطان كلها عليها خوص علشان يدوا لك إحساس الخيمة.

أول ما بتدخل بييجي لك الجرسون بالمنيو الورقي واللي متقسم أجزاء ما بين أطباق عالمية عادية زي الكوردون بلو والدجاج وقسم أكل شرقي مصري، وقسم أكل مغربي وده اللي حبينا نجربه المره دي.

طلبنا شوربة حريرة بـ 50 جنيه، وطاجين كسكسي باللحم بالبرقوق بـ 152 جنيه، وحبينا نجرب طبق تاني عادي فطلبنا chicken chunks بـ 111 جنيه. وعصير ليمون نعناع بـ 36 جنيه، طلبنا كمان green mountain اللي شبه الموخيتو بـ 38 جنيه. و نقدر نقول إن العصير والمشروبات كانت كويسة جدًا. 

بعد حوالي نص ساعة أو أكتر جت الشوربة اللي هي عبارة عن عدس وحمص وقطع لحم مفرومة وجزر في شوربة طماطم كان طعمها كويس بس كان فيه بعض المكونات مش مستوية وده اللي واجهنا برضه في الطيق التاني.

برغم إننا كنا طلبنا نفس الطبق ده في زيارتنا الأخيرة وعجبنا وقتها إلا إن الطعم المره دي كان مختلف تمامًا، الكسكسي ناشف ومافيش مرقة واللحمة مش مستوية يعني كل العناصر باظت ده غير إن الطبق كان متزين بقطع طماطم بطريقة غريبة جدًا وحتى لما قولنا للجرسون والمفروض أنه صلح الطبق إلا إن الطعم فضل غريب وغير متناسق برضه.

المهم قولنا يمكن هم مالهمش في الأكل المغربي نجرب الأكل العادي، وكانت المفاجأة لما وصل طبق الـ chicken chunks اللي مكون من صدور دجاج مخلية كانت مستوية أقل من اللزوم وعليها صوص سويت أند شيلي اللي بنشتريه من السوبر ماركت ده من غير أي محاولة للإبداع مع خضار سوتيه وبطاطس مهروسة من غير صوص!

ولما طلبنا صوص أكسترا جابوا لنا حاجة كده أشبه بالشوربة فيها قطع بصل صغيرة ولونها بني مسمينها براون صوص، وهي أبعد ما يكون عنه.

المهم الطبق التاني برضه كان فيه استسهال غريب وعدم مهنية يعني بمنتهى البساطة ممكن تشتري صدور الدجاج دي من أي سوبر ماركت ومعاها الصوص، ومش لازم تدفع كتير في طبق ممكن تعمله في البيت بمنتهى السهولة.

كنا نتوقع من المكان حرفية ومهنية أكتر من كده، لكن للأسف تجربتنا في ديونز فلام كانت مخيبة جدًا للأمال برغم إن الخدمة ممتازة والمكان مناسب أكتر أنه يبقى كافيه أكثر من مطعم.

نتمنى منهم يحسنوا من مستوى الأكل، وأكيد هنروح تاني علشان يهمنا جدًا المكان ده يفضل محافظ على مستواه اللي كنا متعودين عليه.