The Definitive Guide to Living in the Capital , Cairo , Egypt

الجدل حول المطاعم فى القاهرة دائمًا مشتعل؛ شوية مننا بـ يختاروا الموقع الأجمد حتى لو على حساب جودة الأكل، وناس ثانية بـ يختاروا الأكل الأجمد. الحقيقة أن نادر قوى لما يجتمع الاثنين فى مكان واحد، خصوصًا لما تكون المكونات المستوردة مش بس غالية، لأ وكمان محتاجة ترخيص.

المكان اللى معانا النهارده يصنف فى منطقة الموقع الجامد. فى ركن من أركان المعادى “سكالينى – Scalini” يتكون من قعدة مريحة فى الهواء الطلق، شيشة كويسة ومنيو يغلب عليها -وإن كانت مش كلها– المطبخ الإيطالى.

مافيش أى ذرة ديكور إيطالى فى المكان، لكن على العموم، بـ يستخدموا درجات من البنى والسمنى مع أرضيات من البلاط، ترابيزات وكراسى بلاستيك. وعلشان المكان مشهور بين عشاق الكورة، المطعم ممكن يبقى زحمة جدًا فى أيام الماتشات، وغير كده بـ يكون مريح فى الأيام العادية.

وصلّنا الجرسون لترابيزة فاضية وسلمنا المنيوهات اللى فيها كل الاختيارات الموجودة فى أى منيو من مقبلات، وسلاطات وأطباق رئيسية، وكمان فيها اختيارات لوجبة الإفطار والمخبوزات.

طلبنا ميكسيكان سلاد (32.50 جنيه)، بيف ستراجانوف (75.50 جنيه) وساندويتش ستيك & تشيز بالمشروم (33.50 جنيه).

بالنسبة لوقت التقديم كان معقول، لكن المشكلة كانت جو الصيف وصعوبة القعدة هناك من الحر. لازم تأخذ بالك من الموضوع ده لو كنت رايح الصبح.

أول حاجة وصلت كانت الميكسيكان سلاد، اللى مفروض أنها تتكون من فراخ مقلية، وأنواع جبن، وذرة، وفاصوليا حمراء، وخس وفلفل حلو. اللى وصل لنا كان خيار، وطماطم، وزيتون وجبن أبيض مع فراخ مقلية وصوص 1000 أيلاند. إحنا مش متأكدين إذا كان اللى حصل بسبب غلط فى المطبخ ولّا كان ناقصهم شوية من المكونات، المهم يعنى أن طعم المكونات مش متناسق خالص، والسلاطة مش حلوة للدرجة.

بعد كده وصل الطبق الرئيسي بيف ستراجانوف ومعاه ساندويتش الستيك & تشيز. البيف بـ يكون معاه اختيارك من صنفين، طلبنا منهم خضار سوتيه وبطاطس مهروسة. مع خبرتنا الطويلة فى عالم الأكل والمطاعم، عمرنا ما شوفنا خيار مخلل عائم حول الطبق، بس لازم فيه أول مرة لكل حاجة، ولّا إيه؟

رغم أن الكميات كانت كبيرة، الطعم ما كانش حلو كفاية. طعم اللحم وكمان المرقة كانوا عديمى المذاق. حتى السوتيه كان طعمه أحلى من اللحم، والبطاطس المهروسة كانت لذيذة وغنية بالكريمة.

ساندويتش الستيك & تشيز كان كارثة. اللحم كان عدمان خالص، جبن الموتزاريلا كانت ناشفة، ومافيش تقريبًا أى مشروم، وفوق كل ده كان فيه كمية كبيرة من الزيتون والفلفل الحلو، والكلام ده مش موجود أصلاً فى المنيو. اللى زاد وغطى، الساندويتش كان بارد وشكله مش جذاب.

بشكل عام، التجربة كانت ضعيفة. صحيح الموظفين كانوا ودودين فى توصيلنا للترابيزة واستقبال طلباتنا، والمكان نفسه أجواءه لطيفة للشرب والشيشة، لكن الأكل كان محبط جدًا.