The Definitive Guide to Living in the Capital , Cairo , Egypt

من الآخر كده أحلى وأخف فطير أكلناه فى حياتنا، ده كان لسان حالنا بعد ما مشينا واستمتعنا فى فرع “عجينة – Agina” الجديد فى أمريكانا بلازا بالشيخ زايد، إحنا سبق ورحنا الفرع الأول لهم فى الزمالك، بس تجربتنا دي حققت لنا المقولة الشهيرة أن الأكل متعة ممكن تدخل السرور على أى حد.

فتح جنب “برجر فاكتوري – Burger Factory” اللى لسه فاتح قريب برضه وكتبنا عنه، على اليمين أول ما تدخل بعربيتك وتبدأ تدور على ركنة هـ يشدك باللون الموف المميز له واللى طاغى على كراسي المكان ممزوج باللونين الفوشيا والأبيض برضه فى الترابيزات اللى محطوطة فى ممر على الجانبين، فريق العمل قمة فى الذوق والاحترافية والابتسامة مش بـ تفارق وشهم.

المنيو جميلة قوى بنفس اللون الموف، مبهجة والصور فيها تفتح النفس، مقسمة لفطير رول، وفطير عجينة، وفطير الحلو، والفطير المخصوص (المشلتت)، وفيه أقسام للإضافات الحلو والحادق، وأصناف جانبية زي الباربكيو والثومية والطحينة والمخللات (4 جنيه للواحد) والبطاطس المقلية (6 جنيه)، وكمان المشروبات الساخنة والمثلجة والعصائر، والمشروبات.     

قلنا نجرب حاجة من كل قسم، طلبنا رول شاورما لحمة (22 جنيه) وده عبارة عن شاورمة لحمة وطحينة وطماطم مع بقدونس وبصل، وكمان فطيرة خضروات (21 جنيه) فيها مشروم وسبانخ وفلفل ألوان وصوص بيستو وزيتون وجبنة، وبصراحة هى شدتنا لأن لأول مرة نلاقى صوص بيستو فى مكونات فطيرة.

الجرسون قال لنا أن الفطير هـ يأخذ 30 دقيقة لأنه بـ يتعمل فريش، الصراحة هو أخذ وقت أقل من كده وده فرحنا جدًا، رول الشاورما كان أكثر من رائع، طعم اللحمة نفسها كان وهمي لسه فى فمنا لحد دلوقت، والبقدونس كان فريش وحاسين بالطعم بتاعه اللى عمل إضافة جامدة للرول، وكان سخن ملهلب بس مش لدرجة أننا نتلسع، الطحينة كمان عملت إضافة قوية، من الآخر ما كناش عاوزينه يخلص.

الفطيرة اللى بالخضروات هى كمان كانت استثنائية، قطع الجبنة اللى كانت جواها مع صوص البيستو الأخضر المميز والفلفل الألوان كانوا نجوم الفطيرة دي عيبها الوحيد أنها كانت مشطشطة شوية، بس مش لدرجة كبيرة وبالتالى كان لازم نشرب معاها حاجة تهدي الجو شوية، بـ تُقدم لك على طبق كرتون وتحت الفطيرة ورقة عليها لوجو المكان، وبالتالى تقطيع الفطير بالشوكة والسكين كان مشكلة لأن احتمالية دخول الورق مع مكونات الفطير واردة، الأفضل امسك الفطير بأيدك إن ما كانش سخن مولع، بس إحنا قلنا الملحوظة دي لهم وتقبلوها بصدر رحب ووعدونا أنها هـ تتغير، حجم الفطيرة كبير يكفى فردين بـ ننصحك تقسمها مع صديق لك.

فى الحلويات طلبنا فطيرة بالموز والكراميل (22 جنيه) ودي أول مرة نلاقى فطيرة مكوناتها موز وكراميل وقشطة.. وبسكويت! جاءت لنا فى وقت قياسي، الفطيرة من الداخل محشوة موز وكراميل وقشطة، ومن فوق قطع بسكويت مكسرة قطع صغيرة ومرشوشة بشكل عشوائي فيه فن، الطعم كان حلو جدًا بس عيب البسكويت أنه بـ يقع من على الفطير، أكيد لو كان فيه صوص كراميل من فوق كمان كان مسكوا فى بعض وكان الموضوع هـ يكون ألطف، بس هى خطيرة وخفيفة جدًا عجبتنا فكرتها.

نلطف الدنيا فى الآخر بالمشروبات، طلبنا سبرايت (6 جنيه)، وعصير بطيخ (13 جنيه) وهمي عجبنا جدًا، فريش، مثلج وفيه قطع ثلج مجروش، ختام امتيازي لزيارتنا.

عجينة مكان لطيف بأكله والناس اللى فيه، حتى أن الدعايا بتاعتهم ظريفة مستخدمين فيها مقاطع من أفلام أو أغانى أو مشاهير، شوفوها على صفحتهم على الفيسبوك، وكمان حاطين المنيو بتاعتهم، الأسعار لطيفة ما دفعناش كثير بعد كل الطلبات دي، ومشينا من المكان بطننا مبتسمة علشان استمتعت بالأكل وماشية خفيفة على عكس الإحساس اللى بـ ييجي لنا لما نروح لأى حد بتاع فطير.. برافو “عجينة”.