The Definitive Guide to Living in the Capital , Cairo , Egypt

لما تيجي تقرأ اليافطة اللي على المحل ممكن تتلخبط وتفتكرها “عظْمة” اللي هي مفرد “عظام”، وناس كثير قررت أن هو ده اسم المحل فعلًا وبـ ييجوا من آخر الدنيا علشان يأكلوا من عند “عضمة” على حد قولهم، ولما كنا لسه ما نعرفش المحل ونسمع الناس بـ يتكلموا عنه ونسألهم: ليه كبابجي يسمي نفسه “عضمة” يعني! دي حتى مش لطيفة في حق الناس اللي هـ تأكل من عنده! لو حطينا في الاعتبار مين اللي بـ يأكل العضم. لكن الموضوع بسيط ولو الناس بذلت شوية مجهود هـ يشوفوا الاسم المكتوب بـالإنجليزية “Azama” أو «عَظَمة».

المطعم موجود في شارع التحرير في ميدان الدقي، مش هـ تحتاج تدور عليه علشان الشواية هـ تجيبك من آخر الشارع برائحة تأخذ العقل خاصة أنها مش داخل المحل لكن بره أمامه وحولها الترابيزات والكراسي البلاستيكية البسيطة والناس قاعدة متحمسة ومستنية طبق المشويات العظيم ينزل أمامهم. المحل متخصص جدًا وبـ يعمل أي حاجة مشوية على الفحم، كباب وكفتة وريش ونيفة وفراخ وشيش طاووق، وفيه طبعًا حمام محشي وكبد وكلاوي وأوزي ضاني وفلتو وسجق. كل حاجة ممكن تأخذها بالكيلو والأسعار معقولة، يعني الكفتة والطرب بـ 92 جنيه، الكباب بـ 148 جنيه وجوز الحمام بـ 52 جنيه وفراخ عظمة الشيش على الفحم بـ 44 جنيه والريش الضاني بـ 160 جنيه.

وللتسهيل «عَظَمة» عمل وجبات متنوعة فيها الأصناف اللي ذكرناها وبـ يبقى معاها أرز أبيض أو بالخلطة وخضار. طلبنا منها وجبة مشكل كباب وكفتة “نصف كيلو” بـ 67 جنيه ومعاها طبق أرز وطبق بطاطس بالصلصة “الخضار” وسلاطات، وحبينا نجرب حاجة من منيو الساندويتشات واختارنا الحواوشي الضاني “8/1 كيلو” بـ 13 جنيه.

القعدة هنا في الشارع، ومع ذلك حبينا المكان والجو اللي حولنا واللي زود لنا الإحساس ده هو احتراف العاملين وانتباههم لطلبات الزبائن والسرعة في الأداء. الاحتراف ده تُرجم بسرعة لسلاطات بـ تنزل أمامنا كلها طعمها يجنن وفريش جدًا، طماطم وبابا غنوج وباذنجان مخلل، وعيش محمص على الفحم، وبعدها على طول الحواوشي مع الأرز والخضار، و5 دقائق كمان كان أمامنا طبق المشويات المشكلة وبدأنا رحلة الأكل. المذاق رائع وكل التفاصيل ممتازة، التسوية والتتبيلة وقوام اللحم نفسه وطريقة التقديم، الكباب بس كان فيه دهن كثير لكن الكفتة والحواوشي كانوا خرافة، وحتى الأرز والخضار كانوا مخدومين قوي وكأنهم معمولين في البيت، هي كانت غريبة شوية أننا نأكل أرز وبطاطس مطبوخة مع كباب وكفتة بس مش مهم مادام الطعم حلو وكل حاجة واخدة حقها في الصنعة.

ممكن تطلب أي حاجة في الساندويتش بأسعار من 13 لحد 20 جنيه وفيه مكرونة فرن (6 جنيه) وشوربة وبطاطس محمرة (4 جنيه). والمرة الجاية هـ نيجي هنا علشان نجرب الحمام المحشي المشوي والفراخ اللي ما طلبناش حاجة منهم المرة دي، وبـ نهدي لـ «عَظَمة» أغنية “عَظَمة على عَظَمة” وبـ نقول لكم أن الأكل هنا له طعم ثاني وشواية «عَظَمة» فخر لكل سكان الدقي والمناطق المحيطة، وهـ تنبسطوا بجد سواء قعدتم وأكلتم هناك أو أخذتم الأكل تيك أواي.