The Definitive Guide to Living in the Capital , Cairo , Egypt

مطاعم
عنتر وعروس البحر

عنتر وعروس البحر: أكل مميز وسعره كويس في المهندسين

  • المهندسين : 4 عمر طوسون ، متفرع من شارع أحمد عرابي، ميدان سفنكس
  • من 11 صباحًا الى 2 صباحًا -
تم التقييم بواسطة
Mostafa Fathi Abdelfadil
قيم
قيم الآن
عنتر وعروس البحر: أكل مميز وسعره كويس في المهندسين

أول ما بتوصل شارع أحمد عرابي من ناحية ميدان سفنكس في المهندسين هتلاقي ألف حد يدلك على عنتر وعروس البحر، المكان مساحته كويسة جدًا، لما توصل المطعم هتلاحظ نظافة المكان، كمان فيه ميزة للوسع وهو أنه بيخلي في مسافة بين ترابيزتك وبين أي ترابيزة تانية وده طبعًا بيحفظ خصوصيتك، وأمام كل ترابيزة تقريبًا فيه شاشة عرض حيث الإحساس بالدلع!

طلبنا فرخة مشوية (52 جنيه)، مع أرز بالكبدة (10 جنيه) وطلب ورق عنب (10 جنيه)، بمجرد ما الموظف خد مننا الطلب لاقينا موظف تاني عرض علينا مجموعة كبيرة من السلاطات وطلب مننا نختار اللي عايزينه، اخترنا تومية وبطاطس مايونيز وسلاطة طحينة، بدأنا الأكل، السلاطات كانت مميزة جدًا ونزل لنا معاها عيش شامي سخن لسه خارج من الفرن كان طعمه تحفة. أكتر سلاطة عجبتنا هي التومية، كانت مضبوطة وطعمها مميز لدرجة أننا خلصنا على الطبق كله.

نزلنا الأكل، بدأنا بالفراخ المخلية المشوية على الفحم، كانت تجنن طعمها حلو جدًا، شويها مضبوط، وتوابلها هايلة، لونها دهبي ويفتح النفس فعلًا، نزل مع الفراخ أرز بسمتي مبهر طعمه هايل، أما ورق العنب فكان ميزته أنه طازة، والطلب الواحد ممكن يكفي فردين مش فرد، عيبه الوحيد أن توابله ماكانتش مضبوطة وملحه خفيف شوية.

إحنا جربنا أرز بالكبد في كذا مكان، لكن نقدر نقول أن خلطة عنتر مميزة جدًا وتستحق التجربة، لو تغاضينا عن أن الأرز كان بارد شوية، نقدر نقول أنه عجبنا، مش معجن، والكبدة بتاعته معمولة زي ما الكتاب بيقول.

بعد انتهاء الأكل سألنا الموظف عن الحلو، وكانت المفاجأة المكان مافيهوش حلو، كل ما نسأل على حاجة يقولوا لنا خلصت، ده ضايقنا جدًا، طلبنا شاي بالنعناع، علشان نحبس الأكلة الحلوة دي.

أكتر حاجة بتميز عنتر هي أن أسعاره كويسة جدًا بالمقارنة بباقي المطاعم المشابهة، كمان هو مناسب جدًا للعزومات العائلية، هتلاقي نفسك بتدفع مبلغ مناسب جدًا في النهاية. كمان مستوى النظافة عالي، والقعدة فخمة جدًا والترابيزات الخشب مع الكراسي المريحة بتخليك حاسس بقمة الدلع.

أكيد هنروح عنتر مرة تانية

نصيحة 360

السلاطات هناك مغرية جدًا بلاش تسيب نفسك لها واختار نماذج قليلة لأنها ممكن تشبعك خصوصًا أن العيش السخن اللي بينزل معاها يجنن وممكن تلاقي نفسك مش قادر تاكل بعد كده الطبق الرئيسي.  

أحسن حاجة

الأسعار مناسبة جداً والأكل هايل

أسوأ حاجة

ورق العنب مش دايمًا بيبقى حلو.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح