The Definitive Guide to Living in the Capital , Cairo , Egypt

مطاعم

فريق المطعم من الصم والبكم… تجربة مميزة لكايرو 360 في “كنتاكي” الدقي

إنسانية الصم والبكم ريفيو طعام سريع كنتاكي مطاعم مطاعم القاهرة
فريق المطعم من الصم والبكم… تجربة مميزة لكايرو 360 في “كنتاكي” الدقي
بواسطة
Mohamed Talaat

حاجة حلوة بتميز فرع “كنتاكي” اللي في ميدان فييني بالدقي، وهي أن فريقه بالكامل من “الصم والبكم”، إلا مدير الفرع بسبب أنه لسة ما فيش حد منهم وصل لخبرة أنه يكون مدير، قررنا نروح الفرع ونشوف التجربة بنفسنا.

الضحكة الجميلة على وشوش كل الموظفين ما بتختفيش من الفرع.. وأول مادخلنا على الكاشير ابتسم وشاور لنا على المنيو لطلب الأوردر، وبالفعل اخترنا نوعين من الوجبات وشاور لنا على ماكينة الكاشير لمعرفة السعر، وتم الدفع والانتظار.

أثناء ما كنا منتظرين الطلبات بتاعتنا، قررنا نتمشي في الفرع ونشوف مستوى الخدمة إيه، ولقينا ان العملاء الموجودين بياكلوا ونفسهم مفتوحة ومبسوطين من القعدة، وفجأة خرج مساعد المدير، نده على أحد العاملين، بلغتهم، ولما بص له شاور له على الترابيزات، والعامل ده لبس جونتي بلاستيك، وخرج لمع الترابيزات ونضف المكان وهو مبتسم.

كمان تابعنا طريقة تجهيز الطلبات على شاشة الكمبيوتر، وتعامل الموظفين بسرعة شديدة تجهيزها، لدرجة أن فيه عميل طلب أوردر له ولأولاده، ولكن طلب قطعة واحدة سبايسي، فخرج له الشيف وقاله بلغة الإشارة القطعة دي سبايسي، وشاور على الأولاد كتحذير ان محدش يأكلها منهم.

الأورد بتاعنا خلص ومخدناش بالنا ان الدور علينا، ولكن تم “التصفيق” لنا، فبصينا لقينا الموظف مجهز الطعام وبيشاور لنا ورحنا أخدنا وجبتنا، وهو مبتسم وبيقول لنا “بلغة الإشارة”، الأكل طعمه لذيذ، وشكرناه، وهو بدوره بعت لنا بوسة بإيده.

بننصح كل الناس تروح الفرع في 9 شارع السد العالي – ميدان فيني – الدقي، تجربه وتشجع العمال اللي من الصم والبكم.

مقترح