The Definitive Guide to Living in the Capital , Cairo , Egypt

جربت قبل كده تفطر فول وطعمية أمام أهرامات الجيزة؟ أكيد الموضوع ده ممكن يغير مودك ويحسن من حالتك النفسية.. لكن يا ترى إيه المكان اللي ممكن يحول الحلم ده لحقيقة في القاهرة؟ مطعم وكافيه “Cleopatra Bistro” هيوفرلك أحلى أكل مصري أصلي بسعر مناسب وأمام فيو مستحيل تنساه، وهو أهرامات الجيزة وأبو الهول.. وخلال السطور اللي جاية هنقولكم على كل اللي محتاجين تعرفوه عن المكان ده.

المكان موجود في حضن الأهرامات، والفيو بتاعه أقل وصف له إنه عالمي، فتخيلوا أنكم قاعدين بتاخدوا الدرينك بتاعكم أو بتاكلوا وأنتم أمام الأهرامات وأبو الهول، طبعًا حاجة ولا في الخيال ومالهاش وصف، وكمان التصوير هناك له متعة خاصة لعشاق التصوير.

عندهم الفطار مميز جدًا مع نسمات الصبح الجميلة اللي بتجدد النشاط وبتصفي الذهن، وبيقدموا فيه “فول، طعمية، بيض أومليت، بطاطس، باذنجان، جبنة بالطماطم، سلطة ، جبنة مثلثات، جبنة رومي، لانشون، مسقعة، زبادي، مربى، حلاوة، قطع فطير مشلتت، وعسل أسود”، وكل ده بـ150 جنيه للفرد شامل الخدمة والضريبة، والمواعيد للفطار عندهم من 8 صباحًا حتى  1 مساءً.

وكمان عندهم مكرونات أسعارها بتبدأ من 90 جنيه، وبيتزا بأسعار تبدأ من 170 جنيه، والسندوتشات بتبدأ من 80 جنيه، وده غير الأطباق الرئيسية اللي أسعارها بتبدأ من 150 جنيه.

وكمان المشروبات معقولة عندهم، وهتستمتعوا بيها وسط الفيو العالمي اللي بيتميزوا بيه، والمشروبات الساخنة بتبدأ من 20 جنيه، والعصائر سموزي بـ60 جنيه، والحلويات والآيس كريم بتبدأ من 30 جنيه، والميلك تشيك بـ60 جنيه، والكوكتيلات بتبدأ من 60 جنيه، والمياه الغازية بتبدأ من 25 جنيه.

العنوان: الهرم – 1 شارع أبو الهول السياحي، فندق كيلوباترا بيراميدز ڤيو، أمام بوابة تذاكر الأهرامات.

رقم التليفون للحجز: 01021666617

وعلشان تتعرفوا أكتر عن “Cleopatra Bistro” زوروا صفحتهم على فيسبوك من هنا.