The Definitive Guide to Living in the Capital , Cairo , Egypt

فيه مقولة قديمة بتقول، لما تبدأ يومك بانبساط فاليوم كله بيكون حلو، وطبعًا ممكن يكون الحلو في حياتنا أكلة حلوة، وعلشان الأكل في حياتنا مهم، فإحنا قررنا نبدأ يوم من أيامنا اللي كلها شغل بحاجة مختلفة، فقررنا نروح نفطر في مطعم وكافيه R&J، علشان نجدد طاقتنا وننبسط، وخلال السطور الجاية هننقل لكم تجربتنا هناك واللي كانت في فرع كورنيش المعادي.

R&J هو مبنى من دورين، بتشوفوا منه كورنيش النيل، والدور الأول منه عبارة عن قعدة مميزة بتطل على جنينة صغيرة، والدور الثاني جزء منه متقسم جزأين، جزء كراسيه كبيرة ومريحة، وعندهم جزء خارجي “البلكونة” اللي بتشوفوا منها كورنيش النيل بشكل واضح، بس يعيبها دوشة العربيات الكتير اللي رايحة وجاية، بس لو مركزتوش معاها مش هتشغلكم، وحاجة تانية ماحبنهاش هناك، وهي أن الموظف هناك ماكنش مبتسم، لدرجة إننا اتضايقنا من تكشيرته، ونتمنى الموظفين هناك يقابلوا الناس بشكل  أكثر تفائل ويكونوا مبتسمين خاصة أن الصباح محتاج ابتسامة.

المهم، طلبنا الإفطار بتاعنا وكان عندهم عرض عبارة عن طبق فول بالزبدة، فول بالزيت، 2 طبق جبنة، قرصين طعمية، أومليت، بطاطس، ومخلل وسلطة وباذنجان، وكمان 2 قطعة فطير وعسل مع جبنة قديمة وجبنة كريمي”، وكل ده بسعر 99 جنيه بس، والوجبة بتكفي فردين، والأكل كان جيد والخدمة سريعة، بس للأسف كان لينا ملاحظتين في الأكل، أولهم أن “الفول” مش أحمر زي ما إحنا متعودين، ولكن لونه مدي على الغامق، وده ماحبيناهوش، ولكن الطعم حلو، أما الملاحظة الثانية، فأن الطعمية كانت باردة وطعمها مش أحسن حاجة سواء في الخلطة أو التتبيلة.

أما الفطير المشلتت والعسل والجبنة اللي بينزلوا مع الإفطار فدول حاجة عظمة جدًا، وبننصحكم تجربوهم علشان هما وجبة كافية لفرد حتى لو من الأكيلة بتوع الشلة هيشبع يعني هيشبع، وكمان طلبنا قهوة وشاي وسعر الطلب منهم 28 جنيه، ومافيش عليهم ملاحظات، وبننصحكم تشربوا مشروبكم المفضل في البلكونة بتاعة R&J لإنكم هتستمتعوا جدًا بالفيو والقعدة مع مشروبكم حتى لو الجو كان سقعة.

إجمالي التجربة مرضية بالنسبة لنا، وممكن تكون عظيمة لو كنا طلبنا الفطير المشلتت ومستلزماته مع المشروبات وبس، ولكن بالتأكيد المكان هيطور من نفسه وهيكون أفضل المرات الجاية، وأكيد هنجربه تاني علشان نبدأ يومنا بشكل مختلف ومميز.

تقدروا تعرفوا أكتر عن R&J والمنيو بتاعهم من هنا.