The Definitive Guide to Living in the Capital , Cairo , Egypt

مطاعم
كبابجي أبو عادل

كبابجي أبو عادل: أحلي كفتة وحواوشي في المهندسين

  • 9 شارع جامعة الدول العربية
تم التقييم بواسطة
Mostafa Fathi Abdelfadil
قيم
قيم الآن
كبابجي أبو عادل: أحلي كفتة وحواوشي في المهندسين

لما تفكر تأكل كفتة يبقى لازم تفكر في مكان مضمون وله سمعته، وعلشان كده فكرنا في كبابجي أبو عادل فرع المهندسين، واللي موجود بالتحديد في 9 شارع جامعة الدول العربية.

المكان بيتكون من دورين، الدور الأول تيك أواي، والدور التاني مقسم لصالتين مساحتهم إلي حد ما كبيرة والترابيزات مقسمة بطريقة فيها خصوصية خصوصًا لو حابب تقعد مع خطيبتك أو أسرتك من غير نظرات فضولية حواليك.

السلاطات كانت عادية جدًا، مافيهاش حاجة بتميزها، مجرد سلاطة خضرا سعرها 5 جنيه، وسلاطة طحينة بنفس السعر، ولما طلبنا سلاطة مميزة خاصة بالمكان اتقال لنا “مافيش”.

في البداية طلبنا نص كيلو كفتة مشوية، (سعرها 90 جنيه) الحقيقة طعمها حلو زي ماتوقعنا، التوابل مظبوطة جدًا، واللحمة مستوية وجيدة من حيث المستوى، والجميل أنها كانت ساخنة جدًا يعني كانت معمولة لنا مخصوص لما طلبناها.

طلبنا جنب الكفتة طبق أرز بالشعرية، طعمه كان مميز، وسعره معقول جدًا (9 جنيه) فكرنا بأرز البيت اللي معمول بمزاج وكل حاجة فيه مظبوطة.

الطبق الرئيسي التاني كان فراخ مشوية لأن ماينفعش نكون عند كبابجي أبو عادل ومانجربش الفراخ اللي ريحتها وأنت داخل المطعم تجبرك تجربها من جمالها فطلبنا نص فرخة مشوية، عجبتنا جدًا لأنها مشوية علي الفحم بطريقة محترفة وتوابلها مظبوطة وحجمها كبير.

الموظف اقترح علينا نجرب الأرز باللحمة، وأكد لنا أنه هيعجبنا، وفعلًا كان اكتشاف حقيقي، طعم حلو وتوابل مظبوطة، هو عبارة عن أرز أبيض مطبوخ علي البخار وعليه لحمة مفرومة، وسعره كمان معقول جدًا (14 جنيه). اللحمة اللي عليه كان مستواها حلو.

كبابجي أبو عادل مشهور بالحواوشي بتاعه فقررنا نطلب رغيفين حواوشي علي الفحم ، كمية اللحمة اللي في الرغيف كانت رائعة وقادرة تشبع أي عاشق للأكل، ومخدومة بتوابل مظبوطة جدًا، وسعر الرغيف 25 جنيه.

الموظفين كانوا محترمين جدًا، وبيساعدوك لو محتاج تتعرف على مكونات أي أكلة، وكانوا مهتمين يعرفوا رأينا في كل حاجة من حيث نظافة المكان والأكل والخدمة.

تجربتنا عند أبو عادل كانت مميزة، أكل شرقي هيعجبك.

نصيحة 360

تقدر تطلب دليفري على رقم 0237601376

أحسن حاجة

الحواووشي يجنن

أسوأ حاجة

السلاطات مش مميزة

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح