The Definitive Guide to Living in the Capital , Cairo , Egypt

مطاعم
كونشيرتو – Concerto

كونشيرتو: أكل إيطالي أصلي ومشروبات مختلفة في المعادي

تم التقييم بواسطة
Nagla Ashraf
قيم
قيم الآن
كونشيرتو: أكل إيطالي أصلي ومشروبات مختلفة في المعادي

فيه مثل مصري بـ يقول الجواب بيبان من عنوانه، بس الحياة علمتنا أن ممكن حاجات كثيرة حلوة تفوتك لما تحكم عليها بالشكل بس، وده اللي حصل لنا في زيارتنا لمطعم كونشيرتو – Concerto اللي لسه فاتح في شارع 9، جنب كافيه نعناع اللي كنا كتبنا عنه قبل كده، وأمام توتي ماتي – Tutti Matti.

المحل من بره شكله مش مغري خالص، خاصة بالمقارنة بألوان نعناع المبهجة، مجرد اسم المحل والحائط لونه أبيض، إحنا كنا فاكرين أن المحل عبارة عن الترابيزتين اللي بره بس، لحد ما دخلنا واكتشفنا أن المحل كبير من جوه على عكس توقعنا، الديكور بسيط جدًا بس الخدمة ممتازة والأكل حكاية.

المنيو كان عادي ما بين البيتزا والمكرونة والساندويتشات والأطباق الرئيسية اللي كانت قليلة شوية، بس قائمة الحلو والمشروبات متنوعين جدًا، يعني  أكيد لازم يغروك.

في قائمة المعجنات ما صدقناش نفسنا لما لقينا رافيولي، لأننا عارفين كويس قوي أن مش أي حد يعرف يعمله، وكون أنه موجود في المنيو فده تحدي كنا لازم نقبله، وبالفعل طلبنا رافيولي بالمشروم والفراخ بـ 47 جنيه. ومعاه سموزي Caramel Cruch بـ 28 جنيه، واللي هو عبارة عن لاتيه بالكراميل، وفي أقل من نصف ساعة كان عندنا الرافيولي ودي كانت مفاجأة بالنسبة لنا، وكان كبير وعليه قطع دجاج ومشروم غير الحشو اللي جوه الرافيولي، وعلى عكس توقعاتنا طعمه كان حلو قوي، فعلًا مش طبيعي في حلاوته، خاصة مع الصوص الأبيض وقطع المشروم والدجاج على الوش، استمتعنا بكل قطعة فيه، وسموزي الكراميل كرانش برضه كان حلو، صحيح مرارة القهوة كانت قوية شوية، بس عشاق القهوة بـ يحبوها كده، إنما إحنا بـ نفضل اللبن يبقى طعمه ظاهر أكثر.

بعد الافتتاح العظيم ده قلنا نجرب البيتزا، فطلبنا بيتزا Quattro fromage بـ 45 جنيه، وبرضه ما أخدتش وقت في التسوية وعجينتها كانت رفيعة جدًا بالطريقة الإيطالية اللي بـ نحبها وطعمها كان حكاية، الغريبة أن الشيف ما استخدمش صلصة طماطم جاهزة واكتفى بأنه يحط قطع طماطم بدلها، وكان طعمها حلو جدًا.

قلنا نجرب حاجة ثانية من منيو المشروبات واختارنا سموزي ليمون مع صوص البلو كوراسو بـ 18 جنيه، ودي كانت أجمل حاجة شربناها هناك، مجرد لذاعة الليمون مع صوص البلو كوراسو اللي هو عبارة عن طعم قشر البرتقال المسكر زي ما الجرسون قال لنا، حاجة كده تنقلك لعالم خالي من التفكير لعالم متوازن وجميل.

كنا لازم نختم التجربة دي بحلو مختلف، وتهنا وسط الأصناف ما بين البينا كوتا والوافل والكريب والتيراميسو، وكنا هـ نموت ونذوق البينا كوتا لأنها برضه مش أي حد بـ يعرف يعملها، بس لأننا كنا هناك على العصر كان لسه الشيف ما حضرهاش فرضينا بالتيراميسو بـ 36 جنيه وكان طعمها حلو، لولا بس أن الكريمة كانت ثقيلة شوية، واستخدم معاها شوكولاتة سوداء على الوش، كنا نفضل أنها تبقى شوكولاتة باللبن علشان تكسر مرارة القهوة.

تجربتنا في كونشيرتو تجربة مميزة، أكيد مش هـ تكون زيارتنا الأخيرة، ونتمنى المرة الجاية نذوق البيناكوتا.

نصيحة 360

المكان عامل منيو خاص للعيد، مكون من فتة ولحمة وأرز، مع المشروب اللي تحبوه بـ 150 جنيه للفرد بجانب المنيو العادي.

أحسن حاجة

سموزي الليمون بصوص البلو كوراسو.

أسوأ حاجة

الديكور بسيط.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح