The Definitive Guide to Living in the Capital , Cairo , Egypt

المكان حول كومبوند الكرمة مول فى الشيخ زايد مميز جدًا على الرغم أن مش فيه غير 3 أو 4 مطاعم مميزة، كتبنا قبل كده عن فرع “ستيك أوت” اللى هناك قريب عند حي الندى، وكمان “الكبابجي“، والنهارده هـ نتكلم عن المطعم المقابل له واللى كان مكانه “كافيه مو“.. اسمه “لافا ستون – Lava Stone”.

إحنا رحنا المكان ده من فترة كان لسه ما فتحش، اسمه كان شاددنا، ومرة ثانية رحنا لقيناه قفل خالص واستغربنا وقت لما كان فيه حظر أن بعد الاستعدادات الكبيرة قفل فجأة كده.. من كام يوم جاء على بالنا ثاني وقولنا نشوف أخباره إيه وأخيرًا الحمد لله لقيناه فتح وشغال بس فاضي خالص ما كانش فيه غيرنا، محتاجين دعايا جامدة لأن المكان حلو وأكله كمان اللى هـ نتكلم عنه بالتفصيل، ده غير أن الخدمة محترفة، الحاجة الوحيدة اللى لقيناها دعايا كانت يافطة صغيرة على ناصية الشارع وأنت بـ تلف داخل له!

المكان فيه قسمين، داخلى فيه كنب وقعدات حلوة وواسعة، واللى بره فى الهواء الطلق ودى بـ ننصح بها لأنها وهمية، قعدنا بره ومن مكاننا كنا شايفين المطبخ فى المنتصف بزجاج شفاف من 3 جهات والشيف منتظرنا نطلب الأوردر بتاعنا.

المنيو فخمة وشيك بجلد مبطن والصور تخليك تجوع، الأصناف كانت متميزة وفيه حاجات كنا أول مرة نشوفها، أخذنا من المقبلات شرائح كوسة بصوص الشيرمولا (14.50 جنيه)، ولأول مرة نلاقى شوربة البطاطس بالجبنة (14.50 جنيه) كان عندنا فضول نعرف طعمها عامل إزاى كتغيير، ومن الأطباق الرئيسية ستيك بصوص مسطردة الديجون (79.50 جنيه) وجريلد تشيكن بصوص الليمون (47.50 جنيه) والطلبات الجانبية كثيرة أوى بـ تختار بين خضار سوتيه أو مشوي أو بطاطس محمرة أو بيوريه أو ويدجز أو أرز أو باستا، الاختيارات كثيرة بس الجرسون اللى معانا رشح لنا حاجات وكان متعاون ومهذب جدًا وكان بـ يعمل كل حاجة علشان نتبسط بتجربتنا فى المكان.

نزل لنا سلة عيش (9.50 جنيه) كنا فاكرين فى الأول أنها مجاملة لكن نزلت فى شيك الحساب، بـ ينزل معاها معجون الزيتون الأسود، وكان فيه تشكيلة من العيش والقراميش اللى بسمسم واللى بحبة البركة كان حلو أوى وهـ تلاقى نفسك عمال تلقط منه، لازم تعمل Control يا إما هـ تملأ بطنك ومش هـ تعرف تأكل، شوربة البطاطس جاءت أول حاجة وكانت خطيرة وممكن اثنين يعملوا Share فيها لأن حجمها كبير، قطع البطاطس والجبنة كانت حلوة أوى ودايبة فى الشوربة وكانت على عكس توقعنا خفيفة.. عجبتنا أوى. وراها على طول شرائح الكوسة بصوص الشيرمولا، الصوص كان حراق قوى وما عجبناش خلانا قاعدين نكح، تسوية الخضار حلوة والحمد لله أن الصوص كان منفصل عنها.

الستيك كان حجمه صغير أوى لكن الصوص كان حلو زي ما رشحه الجرسون، الخضار المشوي كان حلو والبطاطس الويدجز كمان كانت لطيفة، بالنسبة للفراخ كان تسويتها جامدة بس صوص الليمون ما كانش واضح فيه طعم الليمون أوى لأن فيه شوية بهارات مغطية على الطعم، لما سألنا الجرسون عن أخبار الأكل حكينا له موضوع الليمون وأصر أنه يعدله وبالفعل ما غابش في المطبخ، طعم الليمون ظهر شوية بس مازالت التوابل طاغية عليه.

نيجي بقى للتقيل اللى بـ نسيبه بالطبع للآخر.. الحلو.. أخذنا وافل بالشوكولاتة البيضاء والعادية بالبندق المحمص (29.50 جنيه)، ما غابتش فى التحضير أوى بس ما جاتش عليها بندق محمص! العجينة كانت كويسة ونوعين صوص شوكولاتة عمل مزيج حلو أوى علشان ما نجزعش من السكر الكثير، طلبنا زجاجة مياه صغيرة (5.50 جنيه) وبعد ما خلصنا لقينا مفاجأة ثانية من المكان قطع جاتوة سواريه صغيرة مجاملة من المكان كانت حلوة أوى منهم وطعمها كمان كان ممتاز.

“لافا ستون” بـ يضيف 12% خدمة ولهم منيو لخدمة التوصيل اسأل عليها وأنت ماشي بس خلى بالك مش موجود فيها كل الأصناف، اللى موجود بس الساندويتشات والبيتزا والباستا ووجبات الفراخ الكاملة مع الطرشي (4.50 جنيه) واختيار الأرز البسمتي والبطاطس الويدجز (9.50 جنيه) أو باستا بينا بصوص الأحمر أو الفيتوتشيني بالصوص الأبيض (19.50 جنيه)، وركن للوجبات الصحية، وآخر قسم للوافل بأنواع وإضافات مختلفة (24.50: 29.50 جنيه).