The Definitive Guide to Living in the Capital , Cairo , Egypt

الأكل في البيت مش مشكلة، ممكن تاكل أي حاجة. لكن لما يكون عندك ضيوف حضروا فجأة، هنا تبقى المشكلة. علشان كده في كايرو 360 جبنا لكم الحل السريع والسحري.. مطبخ “ماما منى”. اللي هنقول لكم على تجربتنا معاهم.

“ماما منى” مطبخ في محيي الدين أبو العز، بيعمل أكل بلدي بيتي وصحي. مافيش عندهم مكان للقعدة، لأنهم بيشتغلوا دليفري بس. قولنا نجرب أكلهم، اللي وصل متغلف كويس جدًا في علب صحية.

طلبنا فرخة محمرة (90 جنيه). وكانت ممتازة في التتبيلة والطعم. ولكن كنا نحب إنها تكون متحمرة أكتر من كده.

 كمان طلبنا محشي ورق عنب، سعر الكيلو (88 جنيه). وده كان رهيب، ملفوف صح ومتخدم عليه كويس. الأرز بتاعه مستوي، ووصل وهو سخن كمان. بس نصيحة مننا، اطلبوا محشي مشكل هيكون أحسن، لأن كمية ورق العنب كانت كتيرة على 4 أفراد.

الممبار كان بـ (50 جنيه) وطعمه ممتاز. متقطع صغير، وحشو الأرز حلو. وتقدروا تطلبوه سبايسي أو عادي. وأكلنا كمان طبق مكرونة بشاميل (45 جنيه). كان عظيم، البشاميل معمول حلو ومستوي تمام. حشو المكرونة كان مليان وتتبيلة اللحمة مظبوطة، ومحمرة من الوش.

طلبنا 1/2 كيلو فراخ بانيه (80 جنيه). ولكن للأسف، التتبيلة ماكنتش كويسة، والتسوية بتاعتها كانت مش مظبوطة. كانت بتتفتفت في إيدينا ومعجبتناش خالص. لكن سامحناهم علشان حلاوة الأكل الباقي.

تليفون: 01068285645

صفحتهم على فيسبوك