The Definitive Guide to Living in the Capital , Cairo , Egypt

الأكل الهندي من الأكلات المميزة اللي بنحب نجربها كل فترة في القاهرة، ومعروف عن الأكل الهندي تنوعه وعشقه للتوابل وده بيخليه حراق وله طرق طهي مميزة وصحية، وخلال السطور الجاية هننقل لكم تجربتنا مع مطعم India Gate اللي جربنا أكله في فرع الدقي.

المكان صغير وديكوراته كلاسيكية وهادي جدًا، وبيشغلوا أغاني هندي طول الوقت، والأكل بياخد 40 دقيقة للتجهيز، وفريق العمل مش كبير، مجرد موظف في صالة الطعام بيخدمكم وبيساعدكم تختاروا من المنيو وبيوضح لكم كل حاجة تحبوا تسألوا عنها.

جربنا الطاجن الأشهر عندهم “حيد أبادي” وسعره 120 جنيه، وهو كان عبارة عن أرز بسمتي باللحمة ومضاف ليه كاجو وزبيب ومطهي بالطريقة الهندية، وبييجي في طاجن مغطى برغيف بيتم تقطيعه قدامكم، وطعم الأرز والمكسرات عظيم، واللحمة كانت كويسة ولكن ناشفة شوية وتعبتنا في التقطيع والأكل، والطاجن بينزل معاه صلطة طحينة وفلفل حار، وصوص تمر هندي وطعمهم كان عظيم جدًا.

كمان طلبنا “باباد مسالا” وسعره 20 جنيه، وهو عبارة عن خبز البابادام، وعليه خضروات متقطعة مع بهارات جميلة بتدي طعم مميز، وخلينا نقول أنه أفضل مقبلات تقدروا تطلبوها مع الأكل.

أما الحلو فقررنا نجرب “آيس كريم جوز الهند”، وسعره 30 جنيه، وهو عبارة عن بولة آيس كريم بتتقدم في شكل ثمرة جوز هند صغيرة وطعمه لطيف وهيشدكم.

استمتعنا بكل تفاصيل الأكل، وحسينا إننا قاعدين في مكان مريح.. جربوه مش هتندموا.

وعلشان تعرفوا أكتر عن المطعم زوروا صفحتهم على الفيسبوك من هنا.