-
9 شارع حسن عاصم - الزمالك
-
شرقي
-
-
1 مساءً - 2 صباحًا -
Dina Mokhtar
كثرت الأماكن اللي بـ تقدم الأكلات الشعبية في الأحياء الراقية –زي الزمالك مثلًا- على أمل أنهم يسحبوا البساط من تحت العربيات والمحلات الموجودة في الأماكن الشعبية، واللي الناس بجميع خلفياتهم وطبقاتهم بـ يروحوا لها مخصوص، طبعًا بـ يبقى فيه فرق في الجودة والأسعار -بالذات الثانية والمبالغ فيها- ده غير الـ Packaging النظيف وديكور المطعم نفسه -شعبي/ مودرن- اللي بقى كليشيه من كثر ما المطاعم استخدمته.
قبل ما نروح "يونايتد كبدة – United Kebda" في الزمالك كان في دماغنا كل اللي إحنا قلناه في أول المقال. بس لما رحنا، الموضوع مختلف تمامًا؛ المكان بسيط جدًا: ترابيزتين بلاستيك، وبار معدني لهواة الأكل على الواقف، أما المطعم نفسه واللي بـ تنزله بسلالم معتمد في ديكوره على اللون الأحمر وهو لونه الأساسي، وفيه عربية في المدخل بـ يتحضر عليها الساندويتشات.
القائمين على الخدمة في منتهى الذوق والأدب، قدموا لنا المنيو ووضحوا لنا أن المطعم بـ يوصل الطلبات للزمالك والدقي، المنيو بسيط واختياراته محدودة بين أربعة أنواع من السجق، وزيهم للكبدة، بالإضافة لعدد من أطباق الباستا والأرز. وبما أن الأكل شعبي، فـ بالتالي الحلو شعبي، ومنحصر في ساندويتشات زي السكلانس، حلاوة بالقشطة والمربى بالقشطة.
بعد 15 دقيقة انتظار -واللي كانت نوعًا ما طويلة بالنسبة لأننا كنا الوحيدين في المكان- بدأنا بساندويتش الكبدة بالبطاطس (11 جنيه)، ممكن تختار ما بين أنه يكون مقدم في عيش تورتيا أو فينو عادي. قررنا أننا نجربه بالتورتيا واللي كانت طازجة بعكس أماكن كثيرة بـ تقدمها ناشفة ومجلدة، نوع الكبدة ممتاز وتتبيلتها مضبوطة غير أن البطاطس المقلية أضافت كثير للساندويتش الممتاز، بس كان ناقصه حاجة واحدة: شوية صوص من الكبدة أو حتى طحينة تطري الموضوع شوية.
ساندويتش الكبدة الإسكندراني (7.5 جنيه) كان ممتاز… "صغير بس يحير"، كمية الكبدة ممتازة بالطحينة الخفيفة اللي كانت مضافة عليها. وبما أننا بـ نحب السجق، جربنا السجق المشوي بالجبنة (7.5 جنيه). بنفس حجم اللي قبله، ونفس الكمية الوفيرة للمكون الأساسي، إلا أن الجبنة كانت مختفية في نصف الساندويتش وللأسف كان طعمها غير متجانس مع بقية المكونات (السجق وقطع الفلفل الألوان) لأنها جبنة مطبوخة وبالتالي بوظت الدنيا. لاحظنا أن جودة لحم السجق كانت أقل بكثير من الكبدة، لأن السجق كان مطاطي نوعًا ما، وغير كده بهاراته كانت أقوى لدرجة أنك ما تحسش بطعم السجق نفسه.
للحلو طلبنا ساندويتش حلاوة بالقشطة (7 جنيه)، الساندويتش مكوناته كانت وفيرة، أما الطعم فكان مضبوط، وبعكس اللي توقعناه، القشطة كانت خفيفة وطعمها غير دهني بالمرة.
بغض النظر عن التأخير في تحضير الأكل أو حتى الحجم الصغير للساندويتشات، "يونايتد كبدة" كمطعم كبدة وسجق ممتاز. الأسعار مناسبة جدًا مقارنة بجودة المكونات، كمية حشوة الساندويتشات ممتازة وطبعًا النظافة وجودة الأكل تخلينا نرجع له ثاني.