The Definitive Guide to Living in the Capital , Cairo , Egypt

قرية تونس هي واحدة من أجمل وأشهر الأماكن السياحية في الفيوم اللي بتتميز بالبساطة، ولو زرت الفيوم قبل كدة لكن ماروحتش قرية تونس يبقى كده فايتك كتير، وماينفعش تقول إنك زرت الفيوم أصلًا، القرية دي بتضم 250 بيت وفيلا متصممين بأسلوب معماري مميز هيخليك تحس إنك رجعت للماضي الجميل.

القرية فيها مساحات رائعة من الأشجار والطبيعة الخضراء، وبيعيش فيها عدد من أنواع الطيور النادرة، وفيها كمان مجموعة جميلة من البساتين وأشجار الزيتون، وبيزورها كتير من السائحين من داخل وخارج البلاد بسبب جمالها الطبيعي ومناخها المميز.

تعالوا نتعرف على أجمل 5 أنشطة تقدر تمارسهم في قرية تونس.

جولة في الطبيعة

من الحاجات العظيمة اللي تقدر تعملها في قرية تونس هي إنك تتمشي فيها بدون هدف، وده هيساعدك تستكشف المكان بنفسك، التمشية مع أسرتك أو أصحابك في أرجاء القرية اللي بتتسم بالبساطة حاجة جميلة، وتقدروا تاخدوا صور تذكارية لتصاميم المنازل والمباني المعمارية المميزة.

ركوب الخيل

لو كنت من عشاق الخيل فقرية تونس هي مكانك الأفضل، وده لإن القرية بتتميز بوجود عدد من الاسطبلات المتخصصة في تأجير الخيول للزوار، ومن فوق ضهر الخيل العربي الأصيل تقدر تشوف وتستمتع بأكبر مساحة ممكنة في المكان.

زيارة أجمل معالم الفيوم

من مميزات قرية تونس إنها قريبة وحوالين حاجات جميلة في الفيوم، زي شلال وادي الريان، وبيوت الطين الأثرية، والأزقة الحجرية، ده غير متحف القرية اللي بيعتبر أول متحف للكاريكاتير في الشرق الأوسط واللي أسسه الفنان التشكيلي محمد عبلة.

شراء أجمل خزف

قرية تونس مشهورة في الأساس بمجال الخزف، وفيها محلات جميلة بتبيع أجمل خزف ممكن تشوفه في حياتك، يعني هترجع منها ومعاك تحف فنية ممكن تهديها لأصحابك أو تزين بيها بيتك.

جولة بحرية مش هتتنسي

تقدر -وبالتنسيق مع قرية تونس- تقوم بجولة بحرية مثيرة على واحدة من القوارب الشراعية داخل بحيرة قارون، واوعى تنسى تاخد الصور التذكارية خلال رحلتك.

كمان تقدر تستمتع بقضاء بعض الوقت في نزهة عائلية ضمن المساحات الخضراء على ضفاف بحيرة قارون المطلة على القرية.

 

عنوان قرية تونس: طريق بحيرة قارون السياحي.

تليفون: 01022275300