The Definitive Guide to Living in the Capital , Cairo , Egypt

أرض مصر مليانة بآثارها من كافة الحقبات الزمنية، وطول الوقت عندنا اكتشافات مهمة من عصور مختلفة “فرعوني – روماني – قبطي – إسلامي”، ومع بداية سنة 2020 نجحت بعثة أثرية في الكشف عن عملات قديمة بترجع للعصر الإسلامي والقبطي، تحت كنيسة قديمة تم بناءها في القرن الرابع الميلادي بمحافظة المنيا.

الكشف الأثري عن العملات جه بالصدفة أثناء شغل البعثة الأثرية للكشف عن المدخل الرئيسي لكنيسة أبوفانا الأثرية،، وهناك اكتشفوا 370 عملة معدنية نادرة بترجع للعصرين الإسلامي والروماني تحت الكنيسة.

والبعثة لقت 342 عملة من العصر الإسلامي، و29 من العصر الروماني، على عمق مترين من سطح الأرض، وحاليًا بيتم العمل على ترميم العملات بيد المتخصصين لدراستها وتوثيقها وتسجيلها وتجهيزها للعرض.

كمان البعثة لقت ضمن الاكتشاف 3 صرر منسوجة من قماش الكتان مخبأة تحت الرمال في السور المحيط بكنيسة أبوفانا اللي موجودة في مركز ملوي التابع لمحافظة المنيا.

خبراء الآثار وضحوا أن العملات اللي تم اكتشافها بعد تسجيلها هتتنقل لمتحف الفن الإسلامي اللي مخصص فيه مكان كامل للعملات وفيه أكتر من 50 ألف عملة أثرية بتنتمي لكل العصور.

وبيضم المتحف عملات زي الدراهم والدنانير، والعملات المكملة اللي استخدمها المسلمين الأوائل كوسيلة للتعامل التجاري زي الدنانير البيزنطية والدراهم الساسانية، واللي مكتوب عليها عبارات بيزنطية، وبعض الصور اللي بتشير للفترة دي زي صورة معبد النار وكسرى الفرس.

يذكر أن كنيسة “أبوفانا” اتأسست على يد القديس أبوفانا في القرن الرابع الميلادي، واتعرفت باسم “دير الصليب”، لاحتوائها على عدد من الصلبان المزخرفة اللي بتنتمي للقرن السادس الميلادي، وهي من أوائل الكنائس اللي اتشيدت في صعيد مصر.