اكتشاف مقبرة جديدة في الجيزة بيرجع تاريخها لـ 2500 سنة قبل الميلاد
أهرامات الجيزة اكتشاف أثري بعثة الآثار المصرية مقبرة وزارة الآثارOmar Abd-elmaqsoud
كنا قولنالكم يوم الخميس اللي فات (2 مايو) إن وزارة الآثار المصرية هتعلن عن تفاصيل اكتشاف أثري جديد في منطقة الأهرامات في الجيزة يوم السبت، وبالفعل تم الإعلان عن الكشف المهم من ساعات قليلة، والتفاصيل في السطور الجاية.
الاكتشاف عبارة عن “مقبرة جماعية” لقيتها بعثة اكتشاف مصرية في منطقة أهرامات الجيزة، بيعتقد إن تاريخها بيرجع لعصر الأسرة الخامسة، يعني حوالى 2500 سنة قبل الميلاد، والاكتشاف ده حصل اثناء أعمال الحفر الأثري في الجزء الجنوبي الشرقي لمنطقة آثار الهرم.
الأمين العام للمجلس الأعلى للآثار “مصطفى وزيري” علق على الاكتشاف ده بإن المقبرة دي ترجع لشخصين واحد منهم اسمه “بحنوي- كا” وليه سبع ألقاب، منها “كاهن المعبودة ماعت” و”أكبر القضاة سناَ في قاعة المحاكمة”.
الشخص التاني اسمه “نوي” وليه خمس ألقاب، أهمها “رئيس المقاطعة الكبيرة” و”المشرف على المستوطنات الجديدة”.
مدير منطقة آثار الهرم “أشرف محي” قال إن المقبرة دي أعيد استخدامها مرة تانية في الدفن على نطاق واسع في العصور المتأخرة، بداية من القرن السابع قبل الميلاد.