The Definitive Guide to Living in the Capital , Cairo , Egypt

قريب جدًا مصر هتدخل التاريخ من أوسع أبوابه بافتتاح أكبر متحف لحضارة واحدة في العالم، واللي هيكون هديتنا للعالم، وهو مقام على مساحة 117 فدان، وهو المتحف المصري الكبير، اللي شارك في تصميمه 1557 مكتب استشاري من كل أنحاء العالم، واللي بيضم لأول مرة المجموعة الكاملة لمقتنيات الملك توت عنخ آمون اللي بتبهر العالم كله.

في السطور الجاية هنقولكم على مجموعة من المعلومات اللي هتعرفكم أكتر على الإنجاز المصري المهم ده.

مبدئيًا المتحف كان مقرر له مكان تاني غير اللي موجود فيه حاليًا، ولكن طبيعة الأرض الرملية وقفت عائق أنه يتعمل، واختارت لجنة متخصصة مكان المتحف الحالي، أمام الأهرامات واللي بتبعد عنه 2 كيلو.

المتحف المصري الكبير تم تشريع قانون خاص به لتنظيمه، وله مجلس أمناء خاص وهيئة مكتب، وموازنة مستقلة، وبتعتبر أمواله “أموال عامة” ملك للشعب المصري اللي بيهدي طفرة حضارية للعالم.

المتحف الكبير بيضم مجموعة صالات توت عنخ آمون، واللي هيتعرض فيها كل محتويات الملك الذهبي، اللي بتقدر بـ5000 قطعة أثرية، على مساحة 7 آلاف متر مربع، ده غير قاعات العرض الدائم اللي مساحتها 20 ألف متر مربع، واللي هتصل لـ100 ألف قطعة أثرية هيتم عرضهم بشكل غير تقليدي.

وهيكون في العرض “قصص” تشد الزوار، عن طريق أحدث تكنولوجيا مستخدمة في العلم، وهتتوفر باللغة ” العربية – الإنجليزية – الفرنسية – اليابانية – الإيطالية – الألمانية”.

مش بس كده، لأ المتحف المصري الكبير كمان هيكون فيه خدمات خاصة لتوفير سبل الراحة لذوي الهمم اللي هيعرفوا كل حاجة عن الآثار في المتحف وقصصه عن طريق التكنولوجيا، والمتحف مستعد بالكامل لاستقبالهم وتعريفهم على الحضارة المصرية القديمة.

والجميل كمان أنهم مانسيوش الأطفال، وهيكون فيه صالة عرض خاصة بيهم اسمها “متحف الطفل”، وده مش هيكون فيه آثار حقيقية، ولكن هيتم الاعتماد على مجسمات مستنسخة علشان الأطفال تتعامل معاها وتنمي معرفتها عن آثار مصر.

من المتوقع أنه يتم افتتاح المتحف المصري الكبير بحفل عالمي يليق بمصر قبل انتهاء 2020، هتتعرض فيه “أوبرا توت عنخ آمون”.

وسعر تذكرة المتحف للجمهور هتكون للمصريين 60 جنيه، و30 جنيه للطلاب، وأما الاجانب فهيكون سعر التذكرة 400 جنيه، و200 جنيه للطلاب.