الوادي الجديد.. رحلة كايرو 360 السياحية لأكبر محافظة في مصر
Mohammed Sabry
يمكن يكون بعضنا مايعرفش معلومات كتير عن محافظة الوادي الجديد، واللي بتشغل حوالي 37.6% من مساحة مصر. وده بيخليها من أكبر محافظات الجمهورية. كايرو 360 طلعت في رحلة للوادي الجديد، علشان تعرفكم عليها أكتر. تعالوا نعرف شوية معلومات في السطور اللي جاية.
سكان الوادي الجديد لهم عادات وتقاليد متفردة، زي العادات اللي بتتميز بها كل محافظة. وكمان هم بارعين في كتير من الصناعات والحرف اليدوية، زي الفخار والأرابيسك. وعلى الرغم من بعد المسافة بين القاهرة والوادي الجديد، اللي بتصل لألف كيلومتر. إلا إنها بتتميز بعدد من الأماكن السياحية، اللي بتجذب السياح طول السنة. واللي موجودة في مراكز المحافظة الثلاثة: الخارجة (العاصمة) – الداخلة – الفرافرة.
نبدأ بمركز الخارجة، وهنلاقي فيه:
معبد هيبس
من أهم المزارات السياحية في مصر. ومكانه بعيد بحوالي 1 كم شمال مدينة الخارجة. المعبد بيمثل العصور التاريخية المختلفة: الفرعونية والبلطيمية والفارسية والرومانية. وهو المعبد الوحيد اللي باقي من العصر الفارسي.
آبار بولاق
دي موجودة على بعد 28 كم ناحية الجنوب. وهي آبار متدفقة ذاتيًا، طالعة من عمق ألف متر تحت الأرض. درجة حرارتها حوالي 28 مئوية. وحواليها مساحات كبيرة من الخضرة. والمياه دي فيها عناصر معدنية، لها فوائد علاجية كتيرة.
وكمان موجود جنب الآبار دي الكثبان الرملية الناعمة. وللي بتُستخدم في علاج أمراض المفاصل، زي: الروماتويد – الالتهاي العظمي المفصلي – آلام الغضاريف.
معبد الناضورة
المعبد موجود على ربوة مرتفعة، في الجهة الشرقية الجنوبية لمعبد هيبس. واتبنى في العصر الروماني. وله على جدرانه بقايا لكتابات هيروغليفية. واتسمى بالاسم ده، لأنه كان بيُستخدم في عصر المماليك للاستطلاع. وكان بيكشف الطريق من مسافة بعيدة.
نروح بقى لمركز الداخلة، وهناك موجود:
قرية القصر الإسلامية
القرية موجودة على بعد 22 كم شمال مدينة الداخلة أو (موط). وفيها آثار إسلامية كتيرة، زي “جامع الشيخ نصر الدين”. وهو واحد من أقدم الجوامع اللي لسه باقية على حالتها لحد النهارده. ده غير مساجد كتيرة من العصر التركي والمملوكي.
قرية البشندي
ودي كل مساكنها مبنية على الطراز الفرعوني. وفيها معبد مدفون في الرمال، بيرجع للأسرة الـ 19 الفرعونية. وفيها المقبرة الرومانية لحكام المنطقة دي، من بداية القرن الأول الميلادي. والمقبرة الإسلامية للشيخ بشندي. اللي اتسمت القرية باسمه. وكانت بتُستخدم لتحفيظ القرآن.
مقابر المزوقة
موجودة على بعد 37 كم من مدينة (موط). وهي عبارة عن جبانة بترجع للعصر الروماني. وبتضم مقابر منحوتة في الصخر. عليها نقوش مختلفة للطيور والمياه ومزارع النخيل. وكمان نقوش للتحنيط.
وأخيرًا مركز الفرافرة، واللي فيه:
الصحراء البيضاء
دي من أشهر الأماكن في الفرافرة. وبيجيلها السياح من كل مكان علشان يستمتعوا بجمالها.
بير 6
بيقع على بعد 6 كم غرب مدينة الفرافة. وده بير بتطلع منه المياه الجوفية اللي بتُستخدم بعد كده في الشرب. وجنبه مساحة كبيرة في مطعم وكافيتيريا ومساحات خضرة كتيرة.
الوادي الجديد محافظة بتتنوع فيها أشكال السياحة زي:
سياحة السفاري: وده لطبيعة المحافظة اللي بتتميز بالتلال الصخرية والوديان والهضاب.
سياحة استشفائية: المحافظة فيها العديد من الأعشاب المفيدة طبيًا. ده غير مياه الآبار اللي فيها عناصر المعدينة كتيرة زي الكالسيوم، والماغنسيوم، والكبريت. وكمان الكثبان الرملية، اللي درجة حراتها بترتفع في الشمس. وبالتالي بتساعد في علاج الأمراض الروماتزمية.
محافظات كتيرة مميزة زي الوادي الجديد موجودة في مصر، بس للأسف مانعرفش عنها كتير. علشان كده دايمًا بنروح لها، ونخليكم تتعرفوا عليها.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
