The Definitive Guide to Living in the Capital , Cairo , Egypt

أعلنت البعثة المصرية الألمانية المسؤولة عن التنقيب عن الآثار في منطقة معبد هليوبلس في المطرية من 13 سنة، عن اكتشاف أجزاء لتماثيل ملكية وحائط كبير من الطوب اللبن، يرجعوا لعصر الدولة الحديثة، ومجموعة من الأواني الفخارية واللي بترجع لعصر الإنتقال الثالث، وكان الكشف قريب من منطقة الورش الصناعية، وعلى عمق متر واحد من المياه الجوفية.

البعثة اكتشفت ضمن الاكتشافات حفرتين، منهم واحدة فيها بقايا نقوش تخص الملك رمسيس الثاني، وكتلة حجرية عليها تمثال للملك رمسيس الثاني أمام الإله “رع حور أختي” الملقب بالإله العظيم سيد السماء وحاكم هيليوبلس، والحفرة الثانية  كان فيها أجزاء من تماثيل ملكية كانت بتمثل جزء من قاعدة تمثال الملك سيتي الثاني (1205- 1194 ق.م) ومصنوعة من الكوارتز البني، وتمثال من الجرانيت الأحمر وفي الغالب يخص الإله “أزيس” أو “حتحور” أو إحدى الملكات من عصر الرعامسة، لسه متمش تحديد هويتها.

كمان البعثة اكتشفت في شارع المعتصم، بعد إزالة طبقة من الرديم، مجموعة من القوالب اللي كانت مخصصة لصناعة التمائم، وأجزاء من أعمدة، ده بالإضافة لـ 3 مربعات حفائر صغيرة من الطوب اللبن، وغالبًا كانت بتمثل مساكن ومصانع للعمال، وده غير الأدوات الحجرية والفخار من فترة عصر المعادي، واللي بتمثل حضارة مصر السفلى اللي سبقت عصر توحيد القطرين.