Mohamed Talaat
مصر مليانة خير، وفي أماكن كتير أجدادنا من الفراعنة سابوا لنا ورثهم علشان نتباها بيه وسط العالم، وآخرها أن في محافظة سوهاج كانوا بيشتغلوا في مشروع الصرف الصحي وبالصدفة اكتشف العمال سور معبد كبير أثري هتدخل بيه المحافظة موسوعة الاكتشافات الأثرية.
سور المعبد لقيوه العمال في قرية “كوم أشقاو”، وده لما كانوا بيحفروا مشروع الصرف الصحي في القرية، وكانت شواهد الاكتشاف بتقول أنه أثري، وده اللي أكد عليه مفتشي آثار سوهاج، واللي اكتشفوا أنه مكون من مجموعة من الأحجار المتراصة بعرض 230 سم تقريبًا، ولسه متحددش طوله قد إيه.
السور اللي تم اكتشافه مش عليه أي نقوش أو زخارف، ولكن مجرد مجموعة من الأحجار المتراصة ودا اللي بيشير على أنه بقايا معبد روماني، أو مقصورة كبيرة داخل معبد، وده اللي هتكشفه الأيام اللي جايه بعد ما وزارة الآثار تبعت بعثة استكشافية علشان يعرفوا نهاية الاكتشاف ايه.